اقمولا وبلىسىنىڭ ەسىل قالاسىندا پوليسەيلەر 49 جاستاعى جەرگىلىكتى تۇرعىندى ۇستادى. ول، قۇقىق قورعاۋ ورگاندارىنىڭ دەرەگىنشە، سوتتىڭ كولىك قۇرالىن باسقارۋ قۇقىعىنان ايىرۋ تۋرالى شەشىمىنە قاراماستان، ماس كۇيىندە قايتادان رولگە وتىرعان. بۇل تۋرالى infohub.kz سايتى حابارلايدى.
اقمولا وبلىسى پوليسيا دەپارتامەنتىنىڭ ءباسپاسوز قىزمەتى ناقتىلاعانداي، ەر ادام دوسىمەن بىرگە تاماق الۋ ءۇشىن كافەگە كەلگەن. جۇرگىزۋشى ورتاشا دارەجەدەگى ماس كۇيىندە بولعان، كەيىن ول مەديسينالىق كۋالاندىرۋمەن راستالدى.
ۆەدومستۆونىڭ مالىمەتىنشە، ەر ادام بۇعان دەيىن دە ماس كۇيىندە كولىك باسقارعانى ءۇشىن جاۋاپكەرشىلىككە تارتىلعان. 2025 جىلدىڭ قاڭتارىندا ول وسىنداي بۇزۋشىلىق ءۇشىن قايتا توقتاتىلىپ، سوت شەشىمىمەن جەتى جىلعا كولىك قۇرالىن باسقارۋ قۇقىعىنان ايىرىلعان.
ءقازىر سوتقا دەيىنگى تەرگەۋ ءجۇرىپ جاتىر. باپتىڭ سانكسياسىنا سايكەس، كولىك باسقارۋ قۇقىعىنان ايىرىلعان ادامنىڭ ماس كۇيىندە كولىك جۇرگىزۋى ءۇشىن 5 مىڭ ايلىق ەسەپتىك كورسەتكىشكە دەيىنگى مولشەردە ايىپپۇل (21 ملن تەڭگەدەن استام)، تۇزەۋ نەمەسە قوعامدىق جۇمىستار، سونداي-اق بەس جىلعا دەيىنگى مەرزىمگە شەكتەۋ نە باس بوستاندىعىنان ايىرۋ جازاسى قاراستىرىلعان.