ەلوردادا «استانا – ەسىرتكىسىز قالا!» اتتى تاقىرىپتىق جولاۋشىلار پويىزى جۇرە باستادى. ول كۇن سايىن استانا – بۋراباي باعىتىمەن قاتىنايدى. جوبا «زاڭ جانە ءتارتىپ» باعدارلاماسى اياسىندا جۇزەگە اسىرىلۋدا، دەپ حابارلايدى infohub.kz.
پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، پويىز ۆاگوندارى ەسىرتكىدەن باس تارتۋعا، سالاۋاتتى ءومىر سالتىن ۇستانۋعا جانە زاڭدى ساقتاۋعا شاقىراتىن ەسكەرتۋ جازۋلارىمەن جانە تاقىرىپتىق ماتەريالدارمەن بەزەندىرىلگەن. سونداي-اق ەسىرتكىنىڭ زاڭسىز اينالىمى فاكتىلەرى تۋرالى حابارلاۋعا بولاتىن ءانونيمدى قىزمەتتەردىڭ بايلانىس دەرەكتەرى ورنالاستىرىلعان.
پوليسەيلەردىڭ ايتۋىنشا، استانا مەن بۋراباي اراسىندا قاتىنايتىن پويىز ءموبيلدى پروفيلاكتيكالىق الاڭعا اينالادى. ونى كۇن سايىن جۇزدەگەن جولاۋشى پايدالانادى، وسىنىڭ ارقاسىندا پروفيلاكتيكالىق ماتەريالدار تۇراقتى تۇردە كەڭ اۋديتوريانى قامتىپ، سالاۋاتتى ءومىردىڭ قۇندىلىعىن، جەكە جاۋاپكەرشىلىكتى جانە ەسىرتكىگە توزبەۋشىلىكتى ەسكە سالىپ وتىرادى.
«نۇرلى جول» تەمىرجول ۆوكزالىندا دا پروفيلاكتيكالىق جۇمىس جولعا قويىلعان. وندا تاقىرىپتىق ينتەراكتيۆتى ايماقتار مەن پروفيلاكتيكالىق الاڭدار ۇيىمداستىرىلىپ، سپورتتىق جانە كورسەتىلىمدىك شارالار وتكىزىلىپ، اقپاراتتىق ەكرانداردا ەسىرتكىگە قارسى بەينەروليكتەر كورسەتىلۋدە. پوليسياداعىلار ۆوكزال ەلوردا تۇرعىندارى مەن قوناقتارى كوپ جينالاتىن ورىنداردىڭ ءبىرى ەكەنىن، سوندىقتان مۇندا پروفيلاكتيكالىق جۇمىس جۇرگىزۋدىڭ ەرەكشە ماڭىزى بار ەكەنىن ءتۇسىندىردى.
ەندى ۆوكزال جولاۋشىلارى تاقىرىپتىق ماتەريالداردى ۇنەمى كورە الادى، ال پويىزدىڭ ءوزى استانا – بۋراباي باعىتى بويىنشا پروفيلاكتيكالىق ميسسياسىن جالعاستىرادى.