قازاقستاندا ايەلدەرگە ەتەككىر كەزەڭىندە اقىلى دەمالىس بەرۋ مۇمكىندىگى تۋرالى ماسەلە ءالى اشىق كۇيىندە قالىپ وتىر. ق ر ەڭبەك جانە حالىقتى الەۋمەتتىك قورعاۋ مينيسترلىگى بۇل تاجىريبەنىڭ بولاشاعىنا قاتىستى پىكىر ءبىلدىردى، دەپ حابارلايدى infohub.kz سايتى.
ەسكە سالايىق، شىلدە ايىنىڭ سوڭىندا چەرنوگوريا پارلامەنتى مىندەتتى مەديسينالىق ساقتاندىرۋ تۋرالى زاڭعا تۇزەتۋلەر قابىلداپ، ايەلدەرگە اۋىرسىناتىن ەتەككىر كەزىندە اقىلى دەمالىس الۋعا مۇمكىندىك بەردى. بۇل قۇقىق ەندومەتريوز، پوليپ نەمەسە ميوما سياقتى ورگانيكالىق سەبەپتەردەن تۋىنداعان ەكىنشىلىك ديسمەنورەيامەن اۋىراتىن ايەلدەرگە قولدانىلادى.
NUR.KZ ءتىلشىسى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە قازاقستاندا وسىعان ۇقساس تاجىريبەنى ەنگىزۋ مۇمكىندىگى تۋرالى سۇراۋ جىبەردى. ۆەدومستۆو حالىقارالىق تاجىريبەنى زەردەلەۋ فيزيولوگيالىق ەرەكشەلىكتەرگە بايلانىستى دەمالىس ەنگىزۋدىڭ ورىندىلىعىن باعالاۋدا ماڭىزدى فاكتور ەكەنىن اتاپ ءوتتى. الايدا قازىرگى ۋاقىتتا ەڭبەك زاڭناماسىن تولىقتىرۋ بويىنشا ەمپيريكالىق دەرەكتەر مەن ۇزاق مەرزىمدى حالىقارالىق مىسالدارعا نەگىزدەلگەن دالەلدى ۇسىنىستار جوق. سوندىقتان مۇنداي دەمالىستى ەنگىزۋ مينيسترلىكتىڭ زاڭ شىعارۋ جۇمىسىنىڭ جوسپارىنا كىرمەيدى.
مينيسترلىك قازاقستاندىق جۇمىسشىلارعا قانداي دەمالىس تۇرلەرى قاراستىرىلعانىن دا ەسكە سالدى. اتاپ ايتقاندا، اقىلى جىل سايىنعى ەڭبەك دەمالىسى جانە الەۋمەتتىك دەمالىستار بەرىلەدى. اقىلى جىل سايىنعى ەڭبەك دەمالىسى جۇمىسشىنىڭ دەمالۋىنا، جۇمىس قابىلەتىن قالپىنا كەلتىرۋگە، دەنساۋلىعىن نىعايتۋعا جانە باسقا دا جەكە قاجەتتىلىكتەرىنە ارنالعان. ول بەلگىلى ءبىر كۇنتىزبەلىك كۇندەرگە جۇمىس ورنى (لاۋازىمى) مەن ورتاشا جالاقىسى ساقتالا وتىرىپ بەرىلەدى. نەگىزگى جانە قوسىمشا اقىلى جىل سايىنعى ەڭبەك دەمالىستارى بار.
الەۋمەتتىك دەمالىس — بۇل جۇمىسشىنى بەلگىلى ءبىر كەزەڭگە جۇمىستان بوساتۋ، انا بولۋعا قولايلى جاعداي جاساۋ، سكرينينگتىك زەرتتەۋلەردەن ءوتۋ، بالا كۇتىمى، وندىرىستەن قول ۇزبەي ءبىلىم الۋ جانە باسقا دا الەۋمەتتىك ماقساتتار ءۇشىن. الەۋمەتتىك دەمالىستارعا جاتادى: جالاقى ساقتالمايتىن دەمالىس، وقۋ دەمالىسى، جۇكتىلىككە جانە بالا تۋۋعا (بالالاردىڭ تۋىلۋىنا)، جاڭا تۋعان بالانى (بالالاردى) اسىراپ الۋعا بايلانىستى دەمالىس، بالا ءۇش جاسقا تولعانعا دەيىن جالاقى ساقتالمايتىن دەمالىس، سكرينينگتىك زەرتتەۋلەردەن ءوتۋ ءۇشىن دەمالىس (جىلىنا ءۇش جۇمىس كۇنىنەن اسپايتىن)، سونداي-اق جۇكتىلىك بويىنشا 12 اپتاعا دەيىن مەديسينالىق ەسەپكە تۇرۋ ءۇشىن دەمالىس (كەمىندە ءۇش جۇمىس كۇنى).