الەمنىڭ تۇكپىر-تۇكپىرىندەگى فۋتبول جانكۇيەرلەرى توپتارى بەيسەنبى كۇنى فيفا پرەزيدەنتى دجانني ينفانتينونىڭ وتستاۆكاعا كەتۋىن تالاپ ەتىپ، پەتيسيا باستادى. ول بولاشاق الەم چەمپيوناتىنىڭ پايداسىن جەكە ينۆەستورلارعا ساتپاق بولعان ەدى. #InfantinOut حەشتەگىمەن تاراعان پەتيسيادا سونداي-اق «فيفا-نى قايتا قۇرۋ قاجەت، وسىلايشا قازىرگى داعدارىس قايتالانباۋى ءۇشىن» دەلىنگەن.
پەتيسيادا «فيفا پرەزيدەنتىنىڭ ءوزى الەم چەمپيوناتىن جەكە ينۆەستورلارعا ساتۋعا جاساعان ۇياتسىز ارەكەتى فۋتبول ەشقاشان ۇمىتپايتىن ساتقىندىقتى اشكەرەلەدى» دەپ اتاپ وتىلگەن. ينفانتينونىڭ كوممەرسيالىق جوباسى قاتتى نارازىلىقتان كەيىن توقتاتىلعان بولاتىن.
پەتيسياعا Football Supporters Europe، Football Supporters Africa، سولتۇستىك امەريكاداعى Independent Supporters Council جانە الەم بويىنشا 40-قا جۋىق ۇلتتىق جانكۇيەرلەر توبى قوسىلدى. ينفانتينوعا دەگەن سەنىمسىزدىك بىلدىرگەن ەۋروپالىق فۋتبول قاۋىمداستىعىنىڭ (ۋەفا) قىسىمىنا قاراماستان، ول وتستاۆكاعا كەتۋدەن باس تارتىپ وتىر. سونداي-اق ونى سولتۇستىك امەريكانىڭ كونكاكاف جانە ازيا فۋتبول كونفەدەراسياسىنىڭ باسشىلارى دا سىنعا الدى.
«دجانني ينفانتينو كوشباسشىلىقتىڭ تەرەڭ داعدارىسىن كورسەتتى، بۇل دەموكراتيالىق باسقارۋعا سايكەس كەلمەيدى. فيفا پرەزيدەنتىنىڭ قولىندا بيلىكتىڭ شوعىرلانۋى، ءمولدىر ەمەس شەشىمدەر قابىلداۋ، تۇلعاعا تابىنۋ جانە ەسەپ بەرمەۋشىلىك الەمدىك باسقارۋشى ورگانعا دەگەن سەنىمنىڭ قالدىعىن دا جويدى»، — دەلىنگەن پەتيسيادا.
«فيفا-نىڭ بەدەلى ءۇشىن جانە ويىننىڭ بولاشاعى ءۇشىن ول وتستاۆكاعا كەتۋى كەرەك»، — دەپ قوسادى پەتيسيا اۆتورلارى. سونداي-اق قۇجاتتا ينفانتينونىڭ جانكۇيەرلەردىڭ نارازىلىعىن تۋدىرعان جوبالاردى قولداعانى، سونىڭ ىشىندە ءساتسىز ەۋروپالىق سۋپەرليگا جوباسى جانە الەم چەمپيوناتىن ەكى جىلدا ءبىر رەت وتكىزۋ يدەياسى ايتىلعان.