فيفا باس وپەراسيالىق ديرەكتورى كەۆين لامۋر شىلدە ايىنىڭ سوڭىندا فەدەراسيا پرەزيدەنتى دجانني ينفانتينونى جاريا تۇردە سىناعاننان كەيىن قىزمەتىنەن كەتتى، دەپ حابارلايدى infohub.kz سايتى.
ربك New York Times-قا سىلتەمە جاساپ حابارلاعانداي، لامۋردىڭ جۇمىستان شىعارىلۋى 31 شىلدەدە ول باسقارعان دەپارتامەنتتىڭ FIFA Forward Enterprise (FFE) باعدارلاماسىنا قاتىستى جانجال اياسىندا ينفانتينونى سىناعان مالىمدەمە جاريالاعاننان كەيىن بولدى. فيفا وكىلى لامۋردىڭ كەتۋىن راستاپ، ەكى جىلعى جۇمىسى ءۇشىن العىس ايتىپ، بولاشاقتا ساتتىلىك تىلەدى. بۇعان دەيىن لامۋر ينفانتينومەن بىرگە ۋەفا-دا دا جۇمىس ىستەگەن.
فيفا-داعى جانجال فەدەراسيانىڭ ايەلدەر، ەرلەر جانە كلۋبتىق الەم چەمپيوناتتارىنىڭ قۇقىقتارىن جەكە ينۆەستورلارعا ساتۋ جوباسىن جاساعاننان كەيىن ءورشىدى. ەۋروپالىق فۋتبول قاۋىمداستىقتارى وداعىنىڭ (ۋەفا) بارلىق مۇشەلەرى بۇل باستامادان تولىق باس تارتىلعانعا دەيىن فيفا تۋرنيرلەرىنە بويكوت جاريالادى. ۋەفا ۇستانىمىن امەريكا جانە ازيا كونفەدەراسيالارى قولدادى، ولار فيفا-نى جاڭا كوممەرسيالىق تۇجىرىمدامانى قالىپتاستىرۋدا جەتكىلىكتى اشىقتىق تانىتپادى دەپ ايىپتادى.
جانجال اياسىندا فيفا باسشىسىنىڭ كەڭەسشىسى نارازىلىق رەتىندە جۇمىستان كەتكەنى بەلگىلى بولدى. ءتىپتى ۋەفا-دا الەم چەمپيوناتىنىڭ ءوز نۇسقاسىن وتكىزۋ جوسپارى ازىرلەندى. كەيىن فيفا الەم چەمپيوناتىنىڭ قۇقىقتارىن ساتۋدىڭ جانجالدى جوسپارىنان باس تارتتى.
جۋىردا فيفا باسشىلىعى ينفانتينوعا قولداۋ ءبىلدىرىپ، ءاچ قۇقىقتارىن ساتۋ جوباسىنداعى قاتەلىكتەردى مويىندادى. سونداي-اق فيفا دجانني ينفانتينونىڭ بەدەلىنە نۇقسان كەلتىرۋ ارەكەتتەرى بولعانىن مالىمدەدى. اقش فۋتبول فەدەراسياسى فيفا باسقارۋ قۇرىلىمىنا وزگەرىستەر ەنگىزۋدى تالاپ ەتىپ، ءبىرقاتار باسقا فۋتبول وداقتارىمەن بىرلەسكەن مالىمدەمە جاريالادى.