الداعى سەنبىدە قورعالجىن وڭىرىندە مادەنيەت پەن تابيعاتتى قاستەرلەيتىندەردىڭ نازارىن اۋداراتىن ءداستۇرلى ءىرى مادەني-تۋريستىك فەستيۆال Flamingo Fest وتەدى، دەپ حابارلايدى اقمولا وبلىسى ىشكى ساياسات باسقارماسى. ءىس-شارانىڭ باستى تاقىرىبى — ولكەنىڭ بىرەگەي تابيعاتىنىڭ مادەنيەتپەن، ۇلتتىق ونەرمەن جانە سالت-داستۇرلەرمەن ۇيلەسىمدى بايلانىسى... دەپ حابارلايدى infohub.kz.
قورعالجىن ولكەسى كولدەرى مەن باي بيوالۋانتۇرلىلىگىمەن تانىمال. باستى تابيعي كورىكتى جەرلەردىڭ ءبىرى — قىزعىلت فلامينگو، ول ءوڭىردىڭ وزىندىك ايىرماشىلىعىنا اينالعان. ءدال وسى فلامينگو فەستيۆالدىڭ سيمۆولى رەتىندە تاڭدالىپ، تابيعات سۇلۋلىعى، ۇيلەسىمدىلىك جانە قورشاعان ورتاعا ۇقىپتى قاراۋ تاقىرىپتارىن بىرىكتىرەدى.
فەستيۆال قوناقتارىن ولكەنىڭ كورىكتى جەرلەرىمەن تانىسۋ كۇتىپ تۇر. مادەني باعدارلاما فولكلورلىق جانە بي ۇجىمدارىنىڭ ونەرلەرىن، ءداستۇرلى مۋزىكانى، گالا-كونسەرتتى، ەتنواۋىلدى جانە ۇلتتىق ويىنداردى قامتيدى. جەكە الاڭ حالىق شىعارماشىلىعىنا ارنالادى: قولونەر شەبەرلەرى ءوز تۋىندىلارىن كورمە-جارمەڭكەدە ۇسىنادى، ال سۋرەتشىلەر وبلىستىق Flamingo Art بايقاۋىنا قاتىسادى. قوناقتار سۋرەتتەر مەن شەبەرلەردىڭ بۇيىمدارى ارقىلى ءوڭىردىڭ تابيعاتى مەن مادەني ەرەكشەلىكتەرىن شىعارماشىلىق تۇرعىدان كورە الادى.
فەستيۆالدىڭ ماڭىزدى بولىگى ەكولوگيالىق باعدارلاما بولادى. قاتىسۋشىلار ءۇشىن قورعالجىن مەملەكەتتىك تابيعي قورىعىنىڭ بيوالۋانتۇرلىلىگىنە، ونىڭ تۇرعىندارىنا جانە تابيعاتتى قورعاۋ ماسەلەلەرىنە ارنالعان تانىمدىق ءىس-شارالار مەن اكسيالار دايىندالادى. وسىلايشا، فەستيۆال مادەني جانە ەكولوگيالىق كۇن ءتارتىبىن بىرىكتىرىپ، تابيعي مۇراعا جاۋاپكەرشىلىكپەن قاراۋعا نازار اۋدارادى.
ۇيىمداستىرۋشىلاردىڭ مالىمەتىنشە، Flamingo Fest تەك اقمولا وبلىسىنىڭ تۇرعىندارىن عانا ەمەس، قازاقستاننىڭ باسقا وڭىرلەرىنەن كەلگەن تۋريستەردى جانە شەتەلدىك قوناقتاردى دا جينايدى. فەستيۆالدىڭ وتكىزىلۋى قورعالجىندى تابيعي كورىكتى جەرلەر ۇلتتىق مادەنيەتپەن جانە زاماناۋي دەمالىس فورماتتارىمەن ۇشتاساتىن تۋريستىك باعىت رەتىندە تانىستىرۋدىڭ تاعى ءبىر مۇمكىندىگى بولادى.
ەكىنشى رەت وتكىزىلىپ وتىرعان Flamingo Fest فەستيۆالىن اقمولا وبلىسىنىڭ تانىمال مادەني-تۋريستىك برەندى رەتىندە دامىتۋ جوسپارلانۋدا. ۇيىمداستىرۋشىلار جوبا تۋريستەردى تارتىپ، ۇلتتىق ونەرگە قىزىعۋشىلىقتى قولداپ، قورعالجىن ولكەسىنىڭ تابيعي مۇراسى تۋرالى قازاقستاندا جانە ودان تىس جەرلەردە ايتۋعا كومەكتەسەدى دەپ سەنەدى.