قازاقستاننىڭ ايەلدەر گاندبول قۇراماسى ازيا ويىندارى-2026-داعى سوڭعى ماچىن وزبەكستان كومانداسىن 35:20 (15:9) ەسەبىمەن سەنىمدى جەڭىسپەن اياقتادى، دەپ حابارلايدى infohub.kz سايتى.
بۇكىل ويىن بويى مارينا پيكالوۆانىڭ شاكىرتتەرى ويىن بارىسىن ءوز قولدارىندا ۇستادى. قازاقستاندىق گاندبولشىلار شەشۋشى سەرپىلىستى ءبىرىنشى تايمنىڭ ورتاسىندا جاساپ، ەسەپتى 6:5-تەن 11:5-كە وزگەرتتى. وسى ارالىقتا كوماندا كاپيتانى يرينا حاساحانوۆا ەكى گول سوقتى، جانەركە سەيتكاسىم، ۆەرونيكا حاردينا جانە ايدا جاپاروۆا ءبىر-بىر رەت كوزگە ءتۇستى.
ءبىرىنشى تايمدى التى دوپ باسىمدىقپەن (15:9) ۇتىپ العان قازاقستاندىقتار ۇزىلىستەن كەيىن ودان ءارى ەركىن ويناپ، ماچتى سەنىمدى جەڭىسپەن اياقتادى — 35:20. سوڭىندا حاساحانوۆا، ايدا جاپاروۆا جانە جانەركە كۋاندىكوۆا التى-التى گول سوقتى. قاقپاشىلار داميرا جاپاروۆا مەن جاننات ايتەنوۆا تاعى دا كوپتەگەن تاماشا سەيۆتەرىمەن كورەرمەندى قۋانتتى.
ءتۋرنيردىڭ بارلىق ماچىن ويناعان قازاقستاندىق گاندبولشىلار التى ۇپايمەن ءۇشىنشى ورىنعا كوتەرىلدى. راس، جۇڭگو قۇراماسى ەكى ماچ از وينادى: مەدال تالاسىنا ارالاسۋ ءۇشىن وعان اۋتسايدەرلەر — گونكونگ پەن ۆەتنامدى جەڭۋ قاجەت.
بۇعان دەيىن قازاقستاندىق گاندبولشىلار ەكى رەت — 2002 جانە 2006 جىلدارى — ازيا ويىندارىنىڭ كۇمىس جۇلدەگەرى اتانعان. ازيادا-2014-تە قىزدارىمىز قولا جۇلدە الدى.
XX جازعى ازيا ويىندارى رەسمي تۇردە 19 قىركۇيەكتە اشىلىپ، 4 قازاندا اياقتالادى. 45 ەلدىڭ سپورتشىلارى قاتىساتىن جارىستا 460 كومپلەكت مەدال ساراپقا سالىنۋدا. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى ونەر كورسەتۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى مما سايىسكەرى ەركىنعالي بۇركىتالين، التىنشىسىن — ارالاس جەكپە-جەكتەگى كوماندالاسى قادىربەك شىنبايەۆ قوستى. 23 قىركۇيەكتە لۋسەنكو ازيا ويىندارى-2026-نىڭ ەكى دۇركىن چەمپيونى اتاندى. سەگىزىنشى جوعارى دارەجەلى مەدالدى 24 قىركۇيەكتە ەسكەكشىلەر ۆلاديسلاۆ ياكوۆليەۆ پەن يۆان چەرنۋحين ەرلەر اراسىنداعى قوس ەسكەكتى قايىق جارىسىندا جەڭىپ الدى.
ويىنداردىڭ التى كۇنىنەن كەيىن قازاقستان بەيرەسمي مەدال ەسەبىندە ءتورتىنشى ورىندا تۇردى.