ءۇندىستاننىڭ ۋتتاراكحاند شتاتىنىڭ تۇرعىنى تاماق جەتكىزۋ قىزمەتىنىڭ كۋرەرىنە جاڭا Adidas كروسسوۆكاسىن سىيلادى. كۋرەر وعان قاراپايىم رەزينا شاركەيمەن كەلگەن ەكەن. اقشاي ەسىمدى ەر ادامنىڭ بۇل قادامى ميلليونداعان قارالىم جيناپ، الەۋمەتتىك جەلىلەردە ۇلكەن قولداۋعا يە بولدى، دەپ حابارلايدى infohub.kz سايتى.
NDTV باسىلىمىنىڭ جازۋىنشا، اقشاي كۋرەردىڭ بۇكىل اۋىسىم بويى اياعىندا قاراپايىم رەزينا شاركەيمەن ءجۇرىپ، جۇمىسىن اتقارىپ جۇرگەنىنە نازار اۋدارعان.
جاريالانعان بەينەجازبادا اقشاي وزىنە جاقىندا جەتكىزىلگەن برەندتىك كروسسوۆكانى اشىپ كورسەتكەن. الايدا ول جاڭا اياق كيىمدى وزىنە قالدىرماي، كۋرەرگە بەرۋدى ءجون كوردى. سەبەبى ونىڭ ايتۋىنشا، كۋرەرگە ول ءقازىر كۇندەلىكتى اۋىر جۇمىسىنا قاتتى قاجەت. كۋرەر الدىمەن قىسىلىپ قالعان، ءبىراق كەيىن ريزاشىلىقپەن سىيلىقتى قابىل الىپ، جاڭا كروسسوۆكانى دەرەۋ كيىپ كورگەن.
بۇل قادامنىڭ بەينەجازباسى Instagram پلاتفورماسىندا تەز تاراپ، ەكى ميلليوننان استام قارالىم جانە جۇزدەگەن مىڭ لايك جينادى. الەۋمەتتىك جەلى قولدانۋشىلارى پىكىرلەردە اقشايدىڭ مەيىرىمدىلىگى مەن جەتكىزۋ قىزمەتى قىزمەتكەرلەرىنىڭ ەڭبەگىنە دەگەن قۇرمەتىن ماقتاپ، مۇنداي قاراپايىم ادامگەرشىلىك ارەكەتتەر الەمدى جاقسارتاتىنىن اتاپ ءوتتى.
پوست اۆتورىنىڭ ءوزى تانىمالدىققا ۇمتىلماعانىن، تەك كۇن سايىن جاياۋ ءجۇرىپ، شاقىرىمداردى باسىپ وتەتىن ادامنىڭ جۇمىس كۇنىن جەڭىلدەتۋدى عانا قالاعانىن ايتتى.