جامبىل وبلىسىنىڭ مەركى اۋدانىندا 580 گەكتار جابايى قاراسورا شابىلىپ، ورتەلدى. بۇل – جالپى وسىمدىك القابىنىڭ شامامەن 3 پايىزىن قۇرايدى، دەپ حابارلايدى infohub.kz.
جامبىل وبلىسى پروكۋراتۋراسىنىڭ مالىمەتىنشە، 2026 جىلدىڭ ماۋسىمىنان باستاپ «قاراسورا – 2026» جەدەل-الدىن الۋ ءىس-شاراسى اياسىندا جابايى قاراسورانى انىقتاۋ جانە جويۋ بويىنشا كەشەندى شارالار جۇرگىزىلۋدە. اۋدانداعى قاراسورانىڭ جالپى القابى شامامەن 19 مىڭ گەكتاردى قۇرايدى. بۇگىنگى كۇنگە دەيىن 376 توننا وسىمدىك شابىلىپ، ورتەۋ ارقىلى جويىلدى.
وسىلايشا، جابايى قاراسورانىڭ ناقتى ونىمدىلىگى گەكتارىنا ورتاشا ەسەپپەن 6،5 سەنتنەردى قۇرادى. جۇمىس توبىنىڭ مۇشەلەرىنەن بولەك، 14 اۋىلدىق وكرۋگتەن 28 ەرىكتى تارتىلىپ، قاجەتتى ارنايى تەحنيكا جۇمىلدىرىلدى.
قاداعالاۋ ورگانىندا اتاپ وتكەندەي، جابايى قاراسورانى جويۋ جۇيەلى تۇردە جۇرگىزىلىپ، ەسىرتكىنىڭ زاڭسىز اينالىمىنىڭ الدىن الۋدىڭ ماڭىزدى شاراسى بولىپ تابىلادى. كەشەندى جۇمىستىڭ ارقاسىندا ەسىرتكى قىلمىسىنىڭ دەڭگەيى تومەندەپ كەلەدى: 2025 جىلدىڭ 7 ايىندا 45 ەسىرتكى قىلمىسى تىركەلسە، بيىلعى جىلدىڭ وسى كەزەڭىندە – 28، ياعني 37،8 پايىزعا از.
ءىس-شارالاردىڭ نەگىزگى ماقساتتارى – ەسىرتكى قىلمىسىنىڭ الدىن الۋ، ەسىرتكى زاتتارىنىڭ زاڭسىز اينالىمىنا جول بەرمەۋ، قوعامدىق قاۋىپسىزدىكتى قامتاماسىز ەتۋ جانە جاس ۇرپاقتى ەسىرتكىنىڭ زياندى اسەرىنەن قورعاۋ.
پروكۋراتۋرا ەسىرتكىنى زاڭسىز ءوسىرۋ، ساقتاۋ، تاسىمالداۋ، ساتۋ جانە وزگە دە ارەكەتتەر قازاقستان زاڭناماسىنا سايكەس جاۋاپكەرشىلىككە اكەپ سوعاتىنىن ەسكە سالدى.
بۇعان دەيىن ەلوردالىق Leodar كومپانياسى سولتۇستىك قازاقستان وبلىسىندا تەحنيكالىق قاراسورا ءوسىرىپ، وڭبەكشى بولعانى حابارلانعان بولاتىن. جوبانىڭ قۇنى 150 ملن دوللارعا باعالانعان، جەر تەلىمى 26،4 مىڭ گەكتاردى قۇرايدى. الايدا كومپانيا ءالى كۇنگە دەيىن جەردى رەسىمدەۋگە قۇجات تاپسىرماعان جانە قارجىلاندىرۋ كوزدەرىن ىزدەپ ءجۇر. Leodar كومپانياسىنىڭ باسشىسى جانە يەسى – الىبەك قاسىموۆ. 2025 جىلى اۋىل شارۋاشىلىعى ۆيسە-مينيسترى ازات سۇلتانوۆ بۇل ايماقتا تەحنيكالىق قاراسورادان قاعاز ءوندىرۋ جوباسىن ىسكە قوسۋ جوسپارى تۋرالى مالىمدەگەن.