فۋتزالدان ەل چەمپيونى الماتىلىق «قايرات» سەنبىدە، 19 قىركۇيەكتە ۇلتتىق بىرىنشىلىكتىڭ تۇراقتى ماۋسىمىنىڭ ءۇشىنشى تۋرىندا «سەمەيدى» ۇتىپ، تۇراقتى كەزەڭنىڭ كوشباسشىسىنا اينالدى، دەپ حابارلايدى infohub.kz سايتى.
فۋتزالدان ەل چەمپيوناتىنىڭ تۇراقتى ماۋسىمى ءبىر اپتا بۇرىن باستالعان ەدى، العاشقى ەكى تۋردان كەيىن ەكى جەڭىسكە جەتكەن ءتورت كوشباسشى بولدى. كەستەنىڭ باسىندا ەكى ويىندا جوعارى ليگا دەبيۋتانتى كوكشەتاۋلىق «وقجەتپەستىڭ» قاقپاسىنا 17 گول سوققان ەل ۆيسە-چەمپيونى «سەمەي» تۇردى. سونداي-اق 6 ۇپاي «كاسپيدە» — ول سىرت الاڭدا «استانانى» ەكى رەت ۇتتى، ەل چەمپيونى «قايراتتا» — ول تاعى ءبىر دەبيۋتانت «ەلوردانى» ەكى رەت تىزە بۇكتىردى، جانە «اقتوبەدە» — ول سىرت الاڭدا «شىمكەنتتى» ەكى رەت ۇتتى.
سەنبىدە، 19 قىركۇيەكتە ءۇشىنشى تۋر كوشباسشىلار تورتتىگىنىڭ ءبىر مۇشەسىنىڭ شىعىپ قالۋىمەن باستالدى: «كاسپي» استانادا كۇتپەگەن جەردەن «ەلورداعا» 4:7 ەسەبىمەن جول بەرىپ، 6 ۇپايمەن بەسىنشى ورىنعا ءتۇستى. ال ءۇشىنشى تۋردىڭ ورتالىق ماچى الماتىدا وتكەن ماۋسىمنىڭ ەكى ءفيناليسى — جەرگىلىكتى «قايرات» پەن «سەمەي» اراسىندا ءوتتى. قوناقتار بۇل ويىندا ەسەپتى ءبىرىنشى اشتى: ءوزىنىڭ بۇرىنعى كلۋبىنىڭ قاقپاسىن «قايراتتىڭ» ەكس-كاپيتانى ءبىرجان ورازوۆ ءدال كوزدەدى، الايدا كەيىن «سەمەيدىڭ» قاقپاشىسى جايمە الاڭنان قۋىلدى دا، ازات ۆاليۋللين تەڭدىكتى قالپىنا كەلتىردى.
كوپ ۇزاماي تاعى ءبىر ەكس-قايراتتىق شىڭعىس ەسەنامانوۆ قوناقتاردى قايتادان العا شىعاردى، ءبىراق اتيرسون وليۆەيرا مەن كايو رۋيس ۇزىلىسكە دەيىن الماتى كلۋبىنىڭ ەسەپتە باسىمدىعىن ورناتتى — 3:2. ال جاھانگير راشيت پەن كايو رۋيس ۇزىلىستەن كەيىن «قايراتتىڭ» باسىمدىعىن ءتىپتى ايقىنداي تۇسكەندە، بۇل ماچتا ءبارى شەشىلگەندەي كورىنۋى مۇمكىن ەدى. الايدا كەيىن «سەمەيدىڭ» ەكى لەگيونەرى پەدرينو مەن دەدەزينو ءوز كومانداسىنىڭ ارتتا قالۋىن ازايتتى، قوناقتار قۇتىلۋعا قۇلشىنا ۇمتىلدى، ءبىراق ۋاقىت جەتپەدى — «قايراتتىڭ» پايداسىنا 5:4.
الماتىلىقتار 9 ۇپاي جيناپ، تۇراقتى ماۋسىمنىڭ كوشباسشىسى اتاندى، راس، تەك سوعىلعان جانە جىبەرىلگەن گولدار ايىرماسى بويىنشا، ويتكەنى كوشباسشىلار تورتتىگىنىڭ تاعى ءبىر مۇشەسى «اقتوبە» سىرت الاڭدا «وقجەتپەسپەن» ماچتا سوڭعى مينۋتتاردا 3:2 ەسەبىمەن جەڭىسكە جەتىپ، سونداي-اق 9 ۇپاي جينادى. ءۇشىنشى ورىندى 7 ۇپايمەن سەنبىدە سىرت الاڭدا «شىمكەنتتى» 4:2 ەسەبىمەن ۇتقان «اتىراۋ» يەلەندى، سونداي-اق 7 ۇپاي رۋدنىيلىق «اياتتىڭ» ەنشىسىندە — ول قاراعاندىدا جەرگىلىكتى «تۇلپاردى» 3:1 ەسەبىمەن ۇتتى.
«سەمەي» مەن «كاسپي» 6 ۇپايمەن ەندى بەسىنشى-التىنشى ورىنداردى ءبولىستى، «تۇلپار» 5 ۇپايمەن جەتىنشى ورىندا، سەگىزىنشى ورىندا 3 ۇپايمەن «ەلوردا» تۇر، توعىزىنشى — ەكى ماچتان كەيىن 1 ۇپايى بار ورالدىق «بايتەرەك»، ازىرگە ءبىر دە ءبىر ۇپاي جيناي الماعاندار: «استانا»، «شىمكەنت» جانە «وقجەتپەس». جەكسەنبىدە، 20 قىركۇيەكتە ءتورتىنشى تۋر اياسىندا سول جۇپتاردا قايتا ماچتار وتەدى، ورتالىق كەزدەسۋ دە الماتىدا «قايرات» پەن «سەمەي» اراسىندا بولادى.