الماتىنىڭ «قايراتى» (U19) ۋەفا جاستار ليگاسىنداعى العاشقى ويىنىن چەرنوگوريانىڭ «ملادوست دونيا گوريسە» كلۋبىن قوناقتا 5:0 ەسەبىمەن ويسىراتا جەڭۋمەن باستادى. چەمپيوندار جولىنىڭ ءبىرىنشى راۋندىنداعى كەزدەسۋ 15 قىركۇيەكتە ءوتتى، دەپ حابارلايدى infohub.kz سايتى.
جورا ارۋتيۋنياننىڭ شاكىرتتەرى قوجايىندارعا ەش مۇمكىندىك قالدىرمادى. ءتىپتى ءبىرىنشى تايم بىتپەي جاتىپ، الماتىلىقتار «ملادوست» قاقپاشىسى داميان يانكوۆيچتىڭ قورجىنىنا ءۇش دوپ سالدى: 35-تەن 43ء-شى مينۋتقا دەيىن رومان چەرنومورەس، اقەجان كاليكۋلوۆ جانە ەرمۇحامماد كەرىمحان كوزگە ءتۇستى.
ەكىنشى تايمدا ابىلاي جىلقايدار مەن سانات نۇربولات ەسەپتى ودان ءارى ۇلعايتىپ، الماتىداعى قارىمتا ويىندى ءفورمالدى ىسكە اينالدىردى. قورىتىندى ەسەپ — قازاقستاندىق كوماندانىڭ پايداسىنا 0:5 (0:3).
وتكەن ماۋسىمدا جاس قايراتتىقتار ۋەفا جاستار ليگاسىنىڭ جالپى كەزەڭىندە كلۋبتىڭ ەرەسەك كوماندالارى چەمپيوندار ليگاسىندا كەزدەسكەن قارسىلاستارىمەن ويناعان بولاتىن. بۇل جولى الماتىلىق جاسوسپىرىمدەر چەمپيوندار جولى دەپ اتالاتىن جولمەن ءجۇر: پلەي-وففقا شىعۋ ءۇشىن ولار ءۇش ىرىكتەۋ كەزەڭىنەن ءوتۋى كەرەك.
«ملادوستتان» كەيىن «قايرات» جاستارىن ۆەنگريالىق متك-مەن 28 قازان جانە 4 قاراشاداعى ويىندار كۇتىپ تۇر. جەڭىس جاعدايىندا الماتىلىقتار 25 قاراشا مەن 9 جەلتوقساندا نە مالتالىق «ۆالەتتامەن»، نە الباندىق «پارتيزانمەن»، نە چەحيالىق «گرادەس-كرالوۆە» كلۋبىمەن وينايدى. «ملادوستپەن» قارىمتا ويىن 14 قازانعا بەلگىلەنگەن.
1/16 فينالدىڭ جەرەبەسى 11 جەلتوقساندا نوندا تارتىلادى.
ۋەفا جاستار ليگاسىنىڭ فورمۋلاسى مىناداي. ءبىرىنشى كەزەڭدە 86 ۇجىم ەكى ۇلكەن توپقا بولىنەدى. ەرەسەك چەمپيوندار ليگاسىنىڭ جالپى كەزەڭىندەگى كلۋبتاردىڭ 36 جاستار كومانداسى چەمپيوندار ليگاسىنىڭ جولىمەن، قالعان 50ء-ى ەلدەردىڭ چەمپيوندار جولىمەن جۇرەدى. 1/16 فينالدان باستاپ جولدار بىرىگەدى.
چەمپيوندار ليگاسى جولىنداعى 36 كلۋبتىڭ 22 ۇزدىگى 1/16 فينالعا شىعادى. بۇل كەزەڭدە 1-دەن 6-عا دەيىنگى ورىنداردى يەلەنگەن كوماندالار 17–22 ورىندارداعى قارسىلاستارمەن كەزدەسەدى. ال 7-دەن 16-عا دەيىنگى ورىندارداعى كلۋبتار چەمپيوندار جولىنىڭ سەگىز ۇزدىك كومانداسىمەن وينايدى.