قاراعاندىدا سپورت كۇنىنە وراي پاراليمپيادا جانە سۋردليمپيادا ويىندارىنىڭ جەڭىمپازدارى مەن جۇلدەگەرلەرى ەرەكشە سىيلىق — جەكە پاتەر كىلتتەرىن الدى، دەپ حابارلايدى infohub.kz سايتى.
التى سپورتشىعا پاتەر كىلتتەرى تابىستالدى. جاڭا قونىس يەلەرى — داستان مۇقاشبەكوۆ، دايانا فەدوسوۆا، ەركەبۇلان كانافين، ايان ءابدىراش، ايجامول ءابدىقاتوۆا جانە ايدا ماقاتوۆا.
سالتاناتتى شارا دوستىق ۇيىندە ءوتىپ، وندا سپورتشىلار، جاتتىقتىرۋشىلار جانە سالا ارداگەرلەرى قۇرمەتتەلدى.
«بۇگىندە قاراعاندى وبلىسىنىڭ مىڭنان استام وكىلى ەلدىڭ ۇلتتىق قۇرامالارىنىڭ قاتارىندا. ءارى قاراي دامۋ ءۇشىن ءبىز جەكەلەگەن نىسانداردى سالۋدان زاماناۋي سپورتتىق ورتا قۇرۋعا جانە كلاستەرلىك تاسىلگە كوشىپ جاتىرمىز. بۇل رەتتە سپورتتىڭ اركىمگە قولجەتىمدى بولۋى ماڭىزدى، سوندىقتان ينكليۋزيۆتى باعىتقا ەرەكشە كوڭىل بولەمىز. ماقساتىمىز — العاش رەت سەكسياعا كەلگەن بالادان باستاپ، قازاقستاندى ءىرى جارىستاردا تانىستىراتىن سپورتشىعا دەيىن بارلىعىنا جاعداي جاساۋ»، — دەپ اتاپ ءوتتى وبلىس اكىمىنىڭ ورىنباسارى الىبەك الدەنەي.
سۋردوتحەكۆونديست ايان ءابدىراش ءوز اسەرىمەن ءبولىستى. قازاقستاننىڭ سپورت شەبەرى تحەكۆوندومەن 18 جىل اينالىسادى. سۋردليمپيادا ويىندارىندا ول بىرنەشە رەت ۇزدىك اتاندى — التىن جانە ەكى قولا مەدال جەڭىپ الدى.
«ماعان تحەكۆوندو سپورت ءتۇرى رەتىندە ۇنايدى. سەكسياعا اتا-انام الىپ كەلدى، قولىمنان كەلە باستادى. قارقىندى جاتتىقتىم، وسىنداي قولداۋ ءۇشىن وتە ريزىنمىن. وبلىستىق اكىمدىك پەن دەنە شىنىقتىرۋ جانە سپورت باسقارماسىنا زور العىسىمدى بىلدىرەمىن»، — دەدى ايان ءابدىراش.
سپورت سالاسىنىڭ ۇزدىك وكىلدەرى قۇرمەت گراموتالارىمەن جانە العىس حاتتارمەن ماراپاتتالدى. بۇل جولى اتى شىققان سپورتشىلار عانا ەمەس، ولاردىڭ اتا-انالارى دا اتالىپ ءوتتى. سپورت ارداگەرلەرى دە قۇتتىقتالىپ، ولارعا سىيلىقتار تابىستالدى.