قاراعاندىدا سوت ارداگەر سپورتشىعا «قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى» اتاعىن بەرۋدەن باس تارتۋدى زاڭسىز دەپ تانىدى، دەپ حابارلايدى infohub.kz سايتى.
قاراعاندى وبلىسى سوتتارىنىڭ رەسمي Telegram-ارناسىندا حابارلانعانداي، سوت ق ر تۋريزم جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنە قاتىستى ارداگەر سپورتشىنىڭ اكىمشىلىك تالاپ-ارىزىن قارادى. تالاپتا سپورت اتاعىن بەرۋدەن باس تارتۋ تۋرالى شەشىمدى زاڭسىز دەپ تانۋ جانە كۇشىن جويۋ، سونداي-اق سپورت اتاعىن بەرۋ تۋرالى قولايلى اكىمشىلىك اكت قابىلداۋعا مىندەتتەۋ سۇرالدى.
تالاپ قويۋشىنىڭ پايىمداۋىنشا، زاڭناما نورمالارىندا حالىقارالىق جارىستاردا قازاقستاندى تانىتىپ، جۇلدەلى ورىندارعا يە بولعان ارداگەر سپورتشىلارعا «قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى» اتاعىن بەرۋگە تىيىم سالۋ نەمەسە شەكتەۋ جوق.
جاۋاپكەر تالاپتى قاناعاتتاندىرماۋدى سۇرادى، سەبەبى اتالعان سپورت اتاعىن بەرۋگە نەگىز — ەرەسەكتەر اراسىنداعى الەم چەمپيوناتىنداعى ناتيجە. دەمەك، ارداگەرلەر اراسىنداعى الەم چەمپيوناتىنا قاتىسۋ جانە ونداعى جۇلدەلى ورىن اتالعان نەگىزگە سايكەس كەلمەيدى.
سوت شەشىمىمەن تالاپ قاناعاتتاندىرىلدى. جاۋاپكەردىڭ داۋلانعان شەشىمى كۇشىن جويىلىپ، سوت شەشىمى زاڭدى كۇشىنە ەنگەن كۇننەن باستاپ ءبىر اي ىشىندە تالاپ قويۋشىعا «قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى» اتاعىن بەرۋ تۋرالى قولايلى اكىمشىلىك اكت قابىلداۋ مىندەتى جۇكتەلدى.
سوت انىقتاعانداي، زاڭنامادا ارداگەر سپورتشىلاردى «ەرەسەكتەر» ساناتىنان شىعاراتىن ەرەجە جوق جانە حالىقارالىق جارىستاردا قازاقستان رەسپۋبليكاسىن تانىتاتىن ارداگەر سپورتشىلارعا سپورت اتاقتارىن بەرۋگە تىيىم سالىنباعان.
قاراعاندى وبلىستىق سوتىنىڭ اكىمشىلىك ىستەر جونىندەگى سوت القاسىنىڭ قاۋلىسىمەن ءبىرىنشى ساتىداعى سوت شەشىمى وزگەرىسسىز قالدىرىلدى.