بۇگىن قازاقستاندا كاسپي تەڭىزى كۇنى اتالىپ وتىلۋدە. ءدال 20 جىل بۇرىن كاسپي تەڭىزىنىڭ تەڭىز ورتاسىن قورعاۋ جونىندەگى نەگىزدەمەلىك كونۆەنسيا، ياعني تەگەران كونۆەنسياسى كۇشىنە ەندى. مەرەكە قارساڭىندا ەلىمىزدە «تازا قازاقستان» ەكولوگيالىق مادەنيەتىن دامىتۋ تۇجىرىمداماسى اياسىندا «Caspian Sea Action Week 2026» حالىقارالىق ۆولونتەرلىك اپتالىعى ءوتتى، دەپ حابارلايدى infohub.kz سايتى.
اپتالىق ءىس-شارالارىنا بارلىق كاسپي ماڭى مەملەكەتتەرىنىڭ دەلەگاسيالارى — ءازىربايجان، رەسەي، يران جانە تۇرىكمەنستان، سونداي-اق وزبەكستان، قىرعىزستان جانە تاجىكستان وكىلدەرى قاتىستى. ولارعا ۆولونتەرلەر، ەكولوگيالىق بەلسەندىلەر، ساراپشىلار جانە جاستار وكىلدەرى قوسىلدى.
6 تامىزدا اپتالىقتىڭ سالتاناتتى اشىلۋ ءراسىمى ءوتتى، ال كەلەسى كۇنى ەكولوگيالىق مونيتورينگتىڭ زاماناۋي تەحنولوگيالارى مەن كاسپي ماڭى ەلدەرىنىڭ عىلىمي زەرتتەۋلەرىنە ارنالعان حالىقارالىق سەمينار مەن دوڭگەلەك ۇستەل ءوتتى.
اپتالىقتىڭ باستى وقيعالارىنىڭ ءبىرى — 8 تامىزدا اقتاۋدا وتكەن «Caspian Clean Challenge» حالىقارالىق ەكولوگيالىق مارافونى. وعان ەكولوگيا جانە تابيعي رەسۋرستار ۆيسە-مينيسترى مانسۇر وشۋربايەۆ قاتىستى. ۆولونتەرلەر پلوگگينگ فورماتىندا جاعالاۋدى اۋقىمدى تازالاۋ جۇرگىزىپ، قوقىستاردى جيناپ، سۇرىپتادى، سونداي-اق ءوڭىردىڭ جاسىل تەحنولوگيالارى مەن ەكولوگيالىق باستامالارىمەن تانىستى.
سول كۇنى اقتاۋدا «كاسپي ءوڭىرى ۆولونتەرلەرىنىڭ دوستىق اللەياسى» اشىلدى، وندا 80-نەن استام اعاش وتىرعىزىلىپ، بولاشاق ۇرپاققا ارنالعان ۇندەۋلەر سالىنعان ۋاقىت كاپسۋلاسى قالاندى.
9 تامىزدا بوزجىرا شاتقالىندا «Bozzhyra Clean Up» اكسياسى ءوتتى. قاتىسۋشىلار ماڭعىستاۋدىڭ بىرەگەي تابيعي لاندشافتتارىمەن تانىسىپ، شاتقال اۋماعىندا ەكولوگيالىق سەنبىلىك وتكىزدى.
10-11 تامىزدا «Caspian Innovation Lab» حالىقارالىق حاكاتونى ءوتتى، ونىڭ اياسىندا قاتىسۋشىلار كاسپي ءوڭىرىنىڭ ەكوجۇيەسىن ساقتاۋ بويىنشا جوبالاردى ازىرلەپ، ساراپشىلارعا تانىستىردى. حاكاتونمەن قاتار TED فورماتىندا اشىق ميكروفون ءوتتى، وندا ەكوۆولونتەرلەر مەن ساراپشىلار تاجىريبە الماسىپ، وزەكتى ەكولوگيالىق ماسەلەلەردى تالقىلادى.
اپتالىقتىڭ قورىتىندى ءىس-شاراسى 12 تامىزدا وتكەن «Caspian Talks» حالىقارالىق ۆولونتەرلەر ءسامميتى بولدى. ول ۆولونتەرلىك قوزعالىس پەن ساراپشىلار قاۋىمداستىعىنىڭ وكىلدەرىن بىرىكتىردى. سامميت اياسىندا حاكاتون جەڭىمپازدارى ماراپاتتالىپ، تاجىريبە الماسۋ جانە ءوڭىردىڭ ەكولوگيالىق سىن-قاتەرلەرىن تالقىلاۋ بويىنشا پانەلدىك سەسسيا ءوتتى. اپتالىق سالتاناتتى جابىلۋ راسىمىمەن اياقتالدى.