15 تامىز كەشكىسىن «كەندەرلى» دەمالىس ايماعىنان جاڭاوزەننىڭ ءۇش تۇرعىنى ۇرلەمەلى قايىقپەن تەڭىزگە شىعىپ، ءىز-تۇزسىز جوعالعان. تۋىستارى بۇل تۋرالى 112 پۋلتىنە حابارلاعان، دەپ مالىمدەيدى infohub.kz سايتى.
تجم قىزمەتكەرلەرى دەرەۋ اۋقىمدى ىزدەستىرۋ وپەراسياسىن ۇيىمداستىردى. ىزدەۋ جۇمىستارىنا دروندار مەن «قازاۆياقۇتقارۋ» تىكۇشاعى جۇمىلدىرىلدى.
ىزدەۋ بارىسىندا قۇتقارۋشىلار جاعاعا وزدىگىنەن ءجۇزىپ كەلە جاتقان ەر ادامدى تاپتى. ونى بورتقا كوتەرىپ، قۇرلىققا جەتكىزدى.
قالعان ەكەۋىن ىزدەۋ تۇندە دە جالعاستى. جۇمىستى قاراڭعىلىق پەن اكۆاتوريانىڭ ۇلكەن اۋماعى قيىنداتتى. ىزدەۋ ءتورت سەكتوردا ءارتۇرلى باعىتتا جۇرگىزىلدى.
قۇتقارۋشىلار اكۆاتوريانىڭ 20 شاقىرىمنان استامىن، ال اۋە ارقىلى 70 شاقىرىمنان استامىن تەكسەردى. ناتيجەسىندە ەكى ەر ادام جاعادان 10 شاقىرىم جەردە ءتىرى كۇيىندە تابىلدى.
وپەراسياعا تجم قۇتقارۋشىلارى مەن ەرىكتىلەر عانا ەمەس، قازاقستاندىق شەكاراشىلار دا قاتىستى.
بۇعان دەيىن استانانىڭ 41 جاستاعى تۇرعىنى «ارىس» كوپىرىنىڭ استىندا ەسىل وزەنىنەن وتپەك بولىپ، كۇشىن دۇرىس ەسەپتەمەي قالعانى حابارلانعان. ونى جانىنداعى قۇتقارۋشىلار امان الىپ قالعان. قوستاناي وبلىسى ءجىتىقارادا تجم قىزمەتكەرلەرى شورتاندى وزەنىندە باتىپ بارا جاتقان ايەلدى قۇتقارسا، سەمەيدە ماس كۇيىندەگى ەر ادامعا كومەك كورسەتىپ، باقىتسىز جاعدايدىڭ الدىن العان.