قازاقستان كولىك مينيسترلىگى اۋە كولىگىمەن جولاۋشىلاردى، باگاج بەن جۇكتى تاسىمالداۋ ەرەجەلەرىنە وزگەرىستەر ەنگىزۋ جوباسىن ازىرلەدى، دەپ حابارلايدى infohub.kz سايتى.
جاڭا ەرەجەلەردىڭ قاتارىندا — مۋزىكالىق اسپاپتاردى تاسىمالداۋدى رەتتەۋ. جولاۋشىلار اسپاپتاردى قول جۇگى رەتىندە سالونعا الا كىرە الادى، بولەك ورىنعا ورنالاستىرا الادى نەمەسە تالاپتار ساقتالعان جاعدايدا باگاجعا تاپسىرا الادى. سالوندا دومبىرا مەن قوبىزدى قورعانىس فۋتليارىندا الىپ ءجۇرۋ مۇمكىندىگى بولەك بەكىتىلگەن. اسپاپتىڭ وراماسىمەن ولشەمى 110×35×30 سم-دەن، سالماعى 10 كگ-نان اسپاۋى ءتيىس.
سونداي-اق اۋە كومپانيالارىنىڭ شارتتارى ساقتالعان جاعدايدا ءۇي جانۋارلارىن سالوندا تاسىمالداۋ مۇمكىندىگىن بەكىتۋ جوسپارلانۋدا.
جوبا مۇگەدەك جولاۋشىلارعا جەڭىلدىكتەردى زاڭنامالىق تۇرعىدان بەكىتۋدى كوزدەيدى جانە ۇشاقتى از سىيىمدىلىقتى اۋە كەمەسىنە ءماجبۇرلى اۋىستىرۋ كەزىندە ورنالاستىرۋ ءتارتىبىن انىقتايدى. تاسىمالداۋدا باسىم قۇقىقتى الەۋمەتتىك وسال توپتار الادى: كامەلەتكە تولماعاندار، مۇگەدەكتەر، اۋىر ناۋقاستار، جۇكتى ايەلدەر مەن زەينەتكەرلەر.
جەكە تۇزەتۋلەر اۋە كومپانيالارىنىڭ جاۋاپكەرشىلىگىن كۇشەيتەدى: جولاۋشىنى جەتكىزۋ كەشىكتىرىلگەنى ءۇشىن ايىپپۇلدى ءوتىنىش بەرىلگەن كۇننەن باستاپ 10 كۇنتىزبەلىك كۇننەن اسپايتىن مەرزىمدە تولەۋ مەرزىمىن بەلگىلەۋ ۇسىنىلادى. سونداي-اق تاسىمالداۋشىلاردىڭ كىناسى دالەلدەنگەن جاعدايدا تىركەلمەگەن باگاجدىڭ ءب ۇلىنۋى ءۇشىن جاۋاپكەرشىلىگى بولۋى مۇمكىن.
جوبا «اشىق نقا» پورتالىندا جاريا تالقىلاۋعا شىعارىلدى. مۇددەلى ازاماتتار مەن ۇيىمدار ۇسىنىستارى مەن ەسكەرتۋلەرىن جولداي الادى.