گرۋزيادا قازاقستاندىق ازاماتقا وزىمەن بىرگە الىپ جۇرگەن دارى-دارمەككە بايلانىستى ۇزاق مەرزىمگە باس بوستاندىعىنان ايىرىلۋ ءقاۋپى ءتونىپ تۇر. وقيعا ءساۋىر ايىندا بولعان، ءبىراق ەندى عانا جاريا بولدى. ششۋچينسك قالاسىنىڭ 44 جاستاعى جۇرگىزۋشىسى يۆان چەكۋلايەۆ پوتي پورتىندا كەدەندىك باقىلاۋدان ءوتۋ كەزىندە ۇستالىپ، ودان اۋىرسىنۋدى باساتىن ءدارى تابىلعان، دەپ حابارلايدى infohub.kz.
ەر ادام گرۋزيادان كەزەكتى رەيسىن ورىنداپ جاتقاندا، كەدەن قىزمەتكەرلەرى ودان ءدارى تاپقان. يۆاننىڭ ايەلى يۋليا چەكۋلاەۆانىڭ ايتۋىنشا، بۇل ءدارىنى گەرمانياداعى دارىگەر ارقا اۋرۋىن ەمدەۋ ءۇشىن جازعان. الايدا ونىڭ قولىندا رەسەپتى بولماعان.
«ءبىز ونى رەيستەن كۇتىپ ءجۇرمىز، ۇيگە ورالعانىن قالايمىز. ول وتە سابىرلى، جاۋاپتى جىگىت. ول ەشقانداي قىلمىس جاساي المايدى. تەك قاعازى قولىندا بولماعان، مىنە، سوندىقتان»، — دەدى جۇرگىزۋشىنىڭ ايەلى.
گرۋزيادا بۇل ءدارى پسيحوتروپتىق جانە ەسىرتكى زاتتارىنا جات قىزىلعان، ولاردىڭ اينالىمى زاڭمەن قاتاڭ رەتتەلەدى. وسىعان بايلانىستى قازاقستاندىققا قاتىستى قىلمىستىق ءىس قوزعالعان.
قازاقستان سىرتقى ىستەر مينيسترلىگى چەكۋلاەۆقا گرۋزيا قىلمىستىق كودەكسىنىڭ 262-بابىنىڭ 1-بولىگى بويىنشا ايىپ تاعىلعانىن راستادى. «بۇل باپ ەسىرتكى نەمەسە پسيحوتروپتىق زاتتاردى ساتۋ ماقساتىنسىز زاڭسىز ساقتاۋ نەمەسە تاسىمالداۋ ءۇشىن جاۋاپكەرشىلىكتى كوزدەيدى. گرۋزياداعى قازاقستاندىق ديپلوماتتار ءوز قۇزىرەتى شەڭبەرىندە وتانداسىمىزعا قاجەتتى كونسۋلدىق-قۇقىقتىق كومەك كورسەتۋدە. بۇل ماسەلە مينيسترلىكتىڭ باقىلاۋىندا»، — دەپ مالىمدەدى ق ر ءسىم.
تەلەارنانىڭ مالىمەتىنشە، كىنالى دەپ تانىلعان جاعدايدا قازاقستاندىققا 15 جىلعا دەيىن باس بوستاندىعىنان ايىرىلۋ جازاسى ءقاۋىپ ءتونىپ تۇر.