ءۇندىستاننىڭ پاراديپ پورتىندا مامىر ايىنان بەرى ۇستالىپ تۇرعان MT UNITY مۇناي تانكەرى بەس ايداي ەل اۋماعىنان شىعا الماي وتىر. كەمە بورتىندا قازاقستان ازاماتى بار. احۋالعا قاتىستى قازاقستان سىرتقى ىستەر مينيسترلىگى تۇسىنىك بەردى، دەپ حابارلايدى infohub.kz سايتى.
سىرتقى ساياسي ۆەدومستۆونىڭ رەسمي وكىلى جانبولات ۋسەنوۆ ءوزىنىڭ Telegram-ارناسىندا راستاعانداي، پاراديپ پورتىندا MT UNITY كەمەسى ۇستالعان، ونىڭ ەكيپاجى 23 تەڭىزشىدەن تۇرادى. ولاردىڭ بىرەۋى — قازاقستان رەسپۋبليكاسىنىڭ ازاماتى. ۇستاۋعا كەمە يەسىنىڭ جەرگىلىكتى وتىن جەتكىزۋشىگە قارىزى سەبەپ بولعان.
«قازاقستاندىق ديپلوماتتار ازاماتىمىزدى ەلگە قايتارۋ ءۇشىن قاجەتتى شارالاردى قولعا الىپ جاتىر. احۋالدى رەتتەۋگە جاردەم كورسەتۋ وتىنىشىمەن ينديا سىم-نە ءتيىستى ديپلوماتيالىق نوتا جولداندى»، — دەپ كەلتىرەدى ۋسەنوۆتىڭ ءسوزىن NUR.KZ.
سونىمەن قاتار اتالعان قازاقستان ازاماتى مەن ونىڭ وتباسى مۇشەلەرى ەلدىڭ ديپلوماتيالىق وكىلدىكتەرىنە كومەك سۇراپ جۇگىنبەگەنى اتاپ ءوتىلدى. دەگەنمەن احۋال قازاقستان سىرتقى ىستەر مينيسترلىگىنىڭ باقىلاۋىندا.
بۇعان دەيىن بۇقارالىق اقپارات قۇرالدارىندا كەمە بورتىندا رەسەيدىڭ 20 ازاماتى، سونداي-اق قازاقستان ازاماتى مەن مىسىردىڭ ەكى ازاماتى بار ەكەنى حابارلانعان. كالكۋتتاداعى رەسەي باس كونسۋلدىعى ناقتىلاعانداي، تۇتقىندالعان مۇناي تانكەرى جوندەۋدى قاجەت ەتەدى، سول سەبەپتى ول ءجۇزۋىن جالعاستىرا المايدى.