براتيسلاۆادا ءوتىپ جاتقان جاستار اراسىنداعى الەم چەمپيوناتىندا (U20) قازاقستاندىق گرەك-ريم كۇرەسىنىڭ بالۋانى قازىبەك كالماگامبەتوۆ التىن مەدال جەڭىپ الدى. فينالدىق بەلدەسۋدە ول بەلارۋستىك ميحايل ماركوۆسكيدى 13:7 ەسەبىمەن ۇتتى، دەپ حابارلايدى infohub.kz.
كالماگامبەتوۆ فينالعا دەيىنگى جولدا نەمىس سەباستيان ۆاگنەردى (9:0) سەنىمدى تۇردە ۇتتى. سودان كەيىن تورەشىلەردىڭ شەشىمىمەن امەريكالىق ەمرين برايان ناتتەردى (1:1) جەڭدى. شيرەك فينالدا قازاقستاندىق مىسىرلىق موحامەد حاسان احمەد موحاماد ابدەلرەحيمنەن (4:1) باسىم ءتۇستى، ال جارتىلاي فينالدا 7:5 ەسەبىمەن ۆەنگر پەترو جيتوۆوزدى تىزە بۇكتىردى. بۇل — قازاقستان قۇراماسىنىڭ تۋرنيردەگى العاشقى مەدالى، ءارى تۇپ-تۋرا التىن!
كوماندانىڭ تاعى ءبىر مۇشەسى مارلان باقايەۆ (72 كەلىگە دەيىن) قولا ءۇشىن جۇبانىش بەلدەسۋلەرىنە وتە المادى. ەراسىل مۇسان (55 كەلى) مەن ماكسيم ۋكراينسيەۆ (97 كەلى) ەرتە كەزەڭدەردە جەڭىلىپ، مەدال ءۇشىن كۇرەسكە ىلىكپەدى.
الدىڭعى كۇنى ەركەبۇلان اناپيا (77 كەلى) قولا ءۇشىن بەلدەسۋدە يراندىق ءامىر ماحدي موحامماد ساەدي ناۆەگە 3:5 ەسەبىمەن ەسە جىبەردى.
حالىقارالىق كۇرەس فەدەراسياسىنىڭ (UWW) ەگيداسىمەن سلوۆاكيا استاناسىندا باستالعان الەم بىرىنشىلىگىنە پلانەتانىڭ تۇكپىر-تۇكپىرىنەن 700-گە جۋىق جاس سپورتشى قاتىسۋدا. ولار كۇرەستىڭ ءۇش تۇرىنەن — گرەك-ريم، ەركىن جانە ايەلدەر كۇرەسىنەن — 120 مەدال جيىنتىعىن ساراپقا سالادى.
براتيسلاۆادا قازاقستان اتىنان 30 سپورتشى — 20 جىگىت پەن 10 قىز — ونەر كورسەتەدى. تۋرنير 23 تامىزدا اياقتالادى.