سلوۆاكيادا جاستار اراسىنداعى كۇرەس بويىنشا الەم چەمپيوناتى جالعاسۋدا، ال كەزەكتى جارىس كۇنى قازاقستان قۇراماسىنا مەدال اكەلمەدى. ءتورت ايەلدەر سالماق دارەجەسىندە وتاندىق سپورتشىلار جۇبانىش بەلدەسۋلەرىنە دە وتە المادى، دەپ حابارلايدى infohub.kz سايتى.
ۇلكەن ءۇمىت 55 كەلىگە دەيىنگى سالماقتا سىنعا تۇسكەن شوديەنا ديلمۋراتوۆاعا ارتىلعان ەدى. شيرەك فينالدا ول ۋكراينالىق كارولينا پوپلاۆسكايادان 0:6 ەسەبىمەن ۇتىلىپ، ونىڭ جالعاسۋ مۇمكىندىگى قارسىلاسىنىڭ فينالعا شىعۋىنا بايلانىستى بولدى. الايدا پوپلاۆسكايا بۇگىن شەشۋشى بەلدەسۋگە وتە الماي، قولا مەدال ءۇشىن كۇرەسەدى. وسىلايشا، ديلمۋراتوۆا جۇبانىش بەلدەسۋلەرىنە قاتىسۋ قۇقىعىن المادى.
ءتۋرنيردىڭ العاشقى كەزەڭدەرىندە جايدار مۇقات (62 كەلىگە دەيىن)، جانگىل بەكەن (65 كەلىگە دەيىن) جانە زەينەپ ەلاماس (76 كەلىگە دەيىن) جارىستان شىعىپ قالدى.
براتيسلاۆاداعى قازاقستاننىڭ جالعىز مەدالى — گرەك-ريم كۇرەسىنەن 67 كەلىگە دەيىنگى سالماقتا توپ جارعان قىزىبەك قالماعامبەتوۆتىڭ التىنى.
حالىقارالىق كۇرەس فەدەراسياسىنىڭ (UWW) قولداۋىمەن ءوتىپ جاتقان الەم بىرىنشىلىگىنە سلوۆاكيا استاناسىنا الەمنىڭ تۇكپىر-تۇكپىرىنەن 700 جاس سپورتشى جينالدى. ولار كۇرەستىڭ ءۇش تۇرىنەن — گرەك-ريم، ەركىن جانە ايەلدەر كۇرەسىنەن 120 جۇلدە جيىنتىعىن ساراپقا سالۋدا.
براتيسلاۆادا قازاقستان اتىنان 30 سپورتشى — 20 جىگىت جانە 10 قىز ونەر كورسەتۋدە.
تۋرنير 23 تامىزدا اياقتالادى.