قازاقستاندا اتاۋلى الەۋمەتتىك كومەك (ااك) جانە مەملەكەتتىك قولداۋدىڭ باسقا دا شارالارى جاساندى ينتەللەكت كومەگىمەن تاعايىندالاتىن بولادى. جاڭا جۇيە مەملەكەتتىك بازالارداعى دەرەكتەر نەگىزىندە وتىنىمدەردى اۆتوماتتى تۇردە تالداپ، تولەم الۋشىلاردى الدىن الا انىقتايدى، دەپ حابارلايدى infohub.kz سايتى.
ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتايەۆ الەۋمەتتىك قورعاۋ شارالارىنىڭ ءبىرىڭعاي سيفرلىق پلاتفورماسىن ەنگىزۋ تۋرالى مالىمدەدى. بۇل جۇيە قولداۋ تاعايىنداۋ جانە تولەمدەر بويىنشا شەشىم قابىلداۋ پروسەستەرىن بىرىكتىرەدى.
«بۇرىن ازامات مەملەكەتتىك ورگاندارعا جۇگىنىپ، راستايتىن قۇجاتتار جيناپ، ولاردىڭ تەكسەرىلۋىن كۇتۋىنە تۋرا كەلەتىن. ەندى ءبىر عانا ءوتىنىش بەرۋ جەتكىلىكتى. بارلىق قاجەتتى مالىمەتتەردى پلاتفورما مەملەكەتتىك اقپاراتتىق جۇيەلەردەن اۆتوماتتى تۇردە الادى. وسىدان كەيىن شەشىم قالىپتاستىرىلىپ، تولەم جۇزەگە اسىرىلادى. وسى جىلدىڭ ماۋسىم ايىنان باستاپ پلاتفورما ەلدىڭ بارلىق 20 وڭىرىندە ونەركاسىپتىك پايدالانۋعا ەنگىزىلدى»، – دەپ اتاپ ءوتتى مينيستر.
جۇيە بارلىعى 13 ءتۇرلى قولداۋ شاراسىن تاعايىنداي الادى، ونىڭ ىشىندە مۇگەدەكتىك بويىنشا جاردەماقىلار، ەمدەۋگە، دارى-دارمەككە، كوممۋنالدىق قىزمەتتەر مەن تەلەفونعا اقى تولەۋگە، وتىن ساتىپ الۋعا كومەك جانە باسقا دا كومەك تۇرلەرى بار.
وسى جىلدىڭ تامىز ايىنان باستاپ جۇيە جي كومەگىمەن اكىمدىكتەر تاراپىنان ءبىرجولعى مەملەكەتتىك قولداۋ شارالارىن، مىسالى، مەرەكەلەر مەن ەسكەرتكىش كۇندەرگە تولەمدەردى تاعايىنداۋعا كومەكتەسەدى. جۇيە ىقتيمال الۋشىلاردى انىقتاپ، تولەم تاعايىنداۋ جوباسىن قالىپتاستىرادى. تولەم تۋرالى تۇپكىلىكتى شەشىمدى جەرگىلىكتى اتقارۋشى ورگان قابىلدايدى.
قىركۇيەك ايىندا eGov Mobile ارقىلى ءوتىنىم بەرۋ مۇمكىندىگىن قامتاماسىز ەتۋ جوسپارلانسا، قازان ايىندا ازاماتتاردىڭ مۇقتاجدىعىن ەسكەرە وتىرىپ، مەملەكەتتىك قولداۋ شارالارىن اتاۋلى تاعايىنداۋ ءۇشىن جاساندى ينتەللەكت ەنگىزىلەدى.
مينيستر ءجي-دىڭ اتاۋلى الەۋمەتتىك كومەكتى (ااك) تاعايىنداۋ كەزىندە بەلسەندى قولدانىلىپ جاتقانىن اتاپ ءوتتى.
«جي ءوتىنىش بەرۋشىنىڭ تۇرمىستىق جاعدايىنىڭ فوتو- جانە بەينەماتەريالدارىن تالدايدى. تالداۋ نەگىزىندە ادامنىڭ اتاۋلى الەۋمەتتىك كومەككە مۇقتاج ەكەندىگى تۋرالى ۇسىنىستار قالىپتاستىرىلادى. بۇل وڭىرلەردەگى ۋچاسكەلىك كوميسسيالاردىڭ جۇمىسىن ايتارلىقتاي جەڭىلدەتىپ، شەشىم قابىلداۋداعى سۋبەكتيۆتىلىكتى ازايتۋعا مۇمكىندىك بەرەدى. مۇگەدەكتىك توبىن بەلگىلەۋ كەزىندە جاساندى ينتەللەكت مەديسينالىق دەرەكتەردى – انامنەزدەر مەن دياگنوزداردى تالدايدى. ول مەديسينالىق-الەۋمەتتىك ساراپتامانىڭ تاۋەلسىز قاتىسۋشىسى رەتىندە شەشىم جوباسىن قالىپتاستىرادى»، – دەپ اتاپ ءوتتى ەڭبەك ءمينيسترى.
مينيستر مەملەكەتتىك كومەكتى اۆتوماتتى تۇردە تاعايىنداۋ كەزىندە جۇيە الۋشىلاردى ءوزى انىقتايتىنىن ايتتى. ول مالىمەتتەردى تەكسەرەدى جانە اۋداندىق، وبلىستىق بيلىكپەن كەلىستىرمەي-اق تولەمدەردى تاعايىندايدى.
مينيستر جۇيە اتاۋلى الەۋمەتتىك كومەك تاعايىنداۋعا 99 مىڭ ءوتىنىمدى جانە مۇگەدەكتىك بويىنشا 151 مىڭ ءوتىنىمدى وڭدەگەنىن اتاپ ءوتتى. شىلدە ايىنان باستاپ 12 مىڭ جاردەماقى اۆتوماتتى تۇردە تاعايىندالدى.
بۇعان دەيىن الماتىدا الەۋمەتتىك كومەك كورسەتۋ ەرەجەلەرى قايتا قارالىپ، تولەمدەردىڭ ءبىر بولىگى الىنىپ تاستالعانى، ال كەيبىر جاردەماقىلار ۇلعايتىلعانى حابارلانعان بولاتىن.