قازاقستاننىڭ ەرلەر باسكەتبول قۇراماسى جاپونياداعى ازيا ويىندارىنداعى ونەرىن مەرزىمىنەن بۇرىن اياقتادى. الەكساندر لىسياك جاتتىقتىراتىن كوماندا ءۇشىنشى رەت قاتارىنان جەڭىلىس تاپتى. جۇڭگو مەن فيليپپيننەن كەيىن باسكەتبولشىلارىمىز باحرەينگە 78:101 ەسەبىمەن جول بەرىپ، ويىنداردىڭ رەسمي اشىلۋىنا بەس كۇن قالعاندا تۋرنيردەن شىعىپ قالدى، دەپ حابارلايدى infohub.kz سايتى.

ناتۋراليزاسيالانعان ويىنشىلاردى تارتۋ تاجىريبەسىنەن باس تارتۋ قۇرامامىزدىڭ ويىنىنا كەرى اسەر ەتتى. بۇگىندە ازيانىڭ ۇزدىك كوماندالارىنىڭ دەڭگەيى قازاقستاندىقتارعا جەتپەيدى. ال مىقتى ورتاشا كوماندالاردىڭ ءوزى بىزگە شاق كەلمەيتىنىن ازيا كۋبوگى-2029-دىڭ ىرىكتەۋ تۋرنيرىندە پالەستينامەن بولعان ويىن كورسەتتى.

قازاقستاندىق باسكەتبولشىلار ازيا ويىندارىنا 1994 جىلدان بەرى قاتىسىپ كەلەدى. 2002 جىلى وڭتۇستىك كورەيانىڭ پۋسان قالاسىندا وتكەن ويىنداردا قۇرامامىز قولا جۇلدە جەڭىپ العان. 1998 جانە 2014 جىلدارى قازاقستان باسكەتبولشىلارى ءتورتىنشى ورىنعا تۇراقتاعان. الايدا ول كەزدەر قايتا ورالماستاي كەتكەن سياقتى. ال قارجىلاندىرۋدىڭ باسىم بولىگىنەن ايىرىلعان «استانا» باسكەتبول كلۋبىنىڭ اينالاسىنداعى جاعداي ءبىزدىڭ باسكەتبولىمىزعا جاقسىلىق اكەلمەيدى.

باحرەينمەن ويىندا قازاقستانعا تەك جەڭىس قانا جاراساتىن. ءبىراق قارسىلاستاردىڭ شەتەلدىك لەگيونەرلەرىمەن تەڭ دارەجەدە تەك ويىن باسىندا عانا وينادىق. ءبىرىنشى توقساننىڭ سوڭىندا باحرەيندىكتەر 28:15 ەسەبىمەن العا شىعىپ، كەيىن باسىمدىقتى ودان ءارى ارتتىرا ءتۇستى. قورىتىندى ەسەپ — 101:78 (28:15، 27:24، 22:17، 24:22).

قازاقستاندىقتار اراسىندا ەڭ كوپ ۇپاي جيناعان دانييل سەۆەرگين — 16 ۇپاي. انتون بىكوۆ 14 ۇپاي سالدى. باحرەيننىڭ كوشباسشىلارى دجاكارر سەمپسون مەن مۋستافا راشيد تيىسىنشە 23 جانە 20 ۇپاي جينادى.

وسى ۋاقىتقا دەيىن شيرەك فينالعا وڭتۇستىك كورەيا، جاپونيا، جۇڭگو، يران، قىتايلىق تايبەي، يوردانيا جانە باحرەين قۇرامالارى جولداما الدى.

ازيا ويىندارى-2026. باسكەتبول. ەرلەر. ا توبى: وڭتۇستىك كورەيا — ساۋد ارابياسى 82:66، جاپونيا — يندونەزيا 98:53، يندونەزيا — وڭتۇستىك كورەيا 48:102، جاپونيا — ساۋد ارابياسى 86:80، ساۋد ارابياسى — يندونەزيا 100:89، جاپونيا — وڭتۇستىك كورەيا 83:100. ورنى: 1. وڭتۇستىك كورەيا — 6، 2. جاپونيا — 5، 3. ساۋد ارابياسى — 4، يندونەزيا — 3.

ۆ توبى: يران — كاتار 53:59، يوردانيا — قىتايلىق تايبەي 80:83، قىتايلىق تايبەي — يران 69:72، كاتار — يوردانيا 65:76، يران — يوردانيا 81:68، قىتايلىق تايبەي — كاتار 91:69. ورنى: 1. يران — 5، 2. قىتايلىق تايبەي — 5، 3. يوردانيا — 4، كاتار — 4.

س توبى: جۇڭگو — قازاقستان 99:61، فيليپپين — باحرەين 85:89، باحرەين — جۇڭگو 59:105، قازاقستان — فيليپپين 78:109، باحرەين — قازاقستان 101:78، جۇڭگو — فيليپپين كەيىنىرەك اياقتالادى. ورنى: 1. باحرەين — 5، 2. جۇڭگو — 4، 3. فيليپپين — 3، قازاقستان — 3.

ويىنداردىڭ رەسمي اشىلۋى 19 قىركۇيەكتە وتەدى. كەلەسى كۇنى ەرلەر اراسىنداعى كلاسسيكالىق 5ح5 باسكەتبولدان فينال مەن 3-ورىن ءۇشىن ماچ وينالادى. سونىمەن قاتار ويىندار باعدارلاماسىندا ايەلدەر اراسىنداعى 5ح5 ءتۋرنيرى، سونداي-اق ەرلەر مەن ايەلدەر اراسىنداعى 3ح3 جارىستارى بار. بارلىق تۋرنيرلەرگە قازاقستان وكىلدەرى قاتىسادى.

XX جازعى ازيا ويىندارى 19 قىركۇيەكتەن 4 قازانعا دەيىن جاپونيانىڭ ناگويا قالاسىندا وتەدى. 45 ەلدىڭ سپورتشىلارى قاتىساتىن كەشەندى جارىستاردا 460 كومپلەكت مەدال ساراپقا سالىنادى: 217ء-سى — ەرلەر، 204ء-ى — ايەلدەر جانە 39-ى — ارالاس رازريادتار اراسىندا. تۋرنيرلەر 41 سپورت ءتۇرىنىڭ 68 ديسيپليناسىندا وتەدى.

ازيادا-2026-دا قازاقستان قۇراماسىنىڭ قۇرامىندا 571 سپورتشى ونەر كورسەتەدى.