جاپونيادا ءوتىپ جاتقان XX جازعى ازيا ويىندارىنىڭ باسكەتبول تۋرنيرىندە ەرلەر قۇراماسى س توبىنداعى العاشقى ماچتا قىتايعا 61:99 ەسەبىمەن جول بەردى. ويىندار 19 قىركۇيەك پەن 4 قازان ارالىعىندا ناگويا قالاسىندا وتەدى، دەپ حابارلايدى infohub.kz سايتى.
الەكساندر لىسياك شاكىرتتەرى ءتورت توقساننىڭ بارلىعىندا دا فاۆوريتتەرگە ەسە جىبەردى — 12:31، 19:27، 13:21، 17:20. قازاقستاندىقتاردىڭ جەڭىمپازداردان جالپى ايىرماشىلىعى 38 ۇپاي بولدى.
ءبىزدىڭ كوماندا ساپىنداعى ەڭ ناتيجەلى ويىنشى — ورتالىق اسقار مايدەكين 11 ۇپاي جينادى. دانييل سەۆەرگين تاعى 10 ۇپاي ەنشىلەدى. قارسىلاستاردان جەنگلين پانگ 19 ۇپايمەن ۇزدىك شىقتى.
ويىن كۇنىنىڭ قالعان ماچتارىندا ا توبىندا وڭتۇستىك كورەيا ساۋد ارابياسىن 82:66 ەسەبىمەن جەڭدى، ال جاپونيا يندونەزيانى 98:53 ەسەبىمەن ويسىراتا ۇتتى. ۆ توبىندا يران قاتارعا 53:59 ەسەبىمەن جول بەردى، يوردانيا جۇڭگو تايبەيىنە 80:83 ەسەبىمەن ۇتىلدى. س توبىنداعى فيليپپين مەن باحرەين اراسىنداعى ەكىنشى ماچ كەيىنىرەك اياقتالادى.
ەرتەڭ قازاقستاندىق باسكەتبولشىلار فيليپپينمەن، ال 14ء-ى كۇنى باحرەينمەن كەزدەسەدى. شيرەك فينالعا ءار توپتان ەكى قۇراما، سونداي-اق ءۇشىنشى ورىن العانداردىڭ ىشىنەن ەكى ۇزدىك كوماندا شىعادى.
ويىنداردىڭ رەسمي اشىلۋى 19 قىركۇيەكتە وتەدى. كەلەسى كۇنى ەرلەر اراسىنداعى كلاسسيكالىق 5ح5 باسكەتبولىنىڭ فينالى مەن ءۇشىنشى ورىن ءۇشىن ماچ وينالادى. سونىمەن قاتار ويىندار باعدارلاماسىنا ايەلدەر اراسىنداعى 5ح5 ءتۋرنيرى، سونداي-اق ەرلەر مەن ايەلدەر اراسىنداعى 3ح3 جارىستارى ەنگىزىلگەن.
قازاقستاندىق باسكەتبولشىلار ازيا ويىندارىنا 1994 جىلدان بەرى قاتىسىپ كەلەدى. 2002 جىلى وڭتۇستىك كورەيانىڭ پۋسان قالاسىندا وتكەن ويىنداردا قۇرامامىز قولا جۇلدەگە قول جەتكىزدى. 1998 جانە 2014 جىلدارى قازاقستان باسكەتبولشىلارى ءتورتىنشى ورىن الدى.
ءتۋرنيردى ەڭ كوپ جۇڭگو جەڭىپ العان — 8 رەت. ويىنداردىڭ قازىرگى چەمپيونى — فيليپپين. دەمەك، ءبىزدىڭ كوماندانىڭ توپتاعى قارسىلاستارى مىقتى.
XX جازعى ازيا ويىندارى جاپونيانىڭ ناگويا قالاسىندا 19 قىركۇيەك پەن 4 قازان ارالىعىندا وتەدى. 45 ەلدىڭ سپورتشىلارى قاتىساتىن كەشەندى جارىستاردا 460 مەدال كومپلەكتىسى ساراپقا سالىنادى: 217ء-سى ەرلەر اراسىندا، 204ء-ى ايەلدەر اراسىندا جانە 39-ى ارالاس رازريادتاردا. تۋرنيرلەر 41 سپورت ءتۇرىنىڭ 68 ديسيپليناسىندا وتەدى.
ويىنداردا قازاقستان قۇراماسى ساپىندا 500-دەن استام سپورتشى ونەر كورسەتەدى.