قازاقستان ايەلدەر باسكەتبول قۇراماسى ازيا ويىندارى-2026-دا العاشقى جەڭىسىنە قول جەتكىزدى. درامالىق سوڭىندا گونكونگ كومانداسىن وۆەرتايمدا 80:77 (12:10، 17:19، 11:14، 28:25، 12:9) ەسەبىمەن تىزە بۇكتىردى. ۆ توبىندا ءۇشىنشى ورىنعا تۇراقتاعان قازاقستاندىقتار پلەي-وففقا شىعۋ مۇمكىندىگىن ساقتاپ قالدى، دەپ حابارلايدى infohub.kz سايتى.
جاپوندارمەن 23:88 ەسەبىمەن ويسىراي جەڭىلگەن ماچتان كەيىن بوريس فاتكۋلين شاكىرتتەرى بۇل جولى ابدەن باسەكەگە قابىلەتتى كورىندى. ويىن بارىسىندا كوشباسشىلىق كەزەك-كەزەك قولدان قولعا ءوتىپ وتىردى.
ءتورتىنشى توقساندا گونكونگ 11 ۇپايعا العا كەتتى – نەگىزگى ۋاقىت بىتۋگە ءتورت مينۋت قالعاندا 62:51. الايدا جاپونداردان جارالانعان قازاقستاندىق قىزداردىڭ نامىسى ويانىپ، ولار كەرەمەت كامبەك جاسادى. سيرەنا تابلونى تەڭ ەسەپپەن تىركەدى – 68:68.
وۆەرتايمدا قارسىلاستاردىڭ ۇزدىكسىز پرەسسينگىنە قارسى ءدارى تاپقان قازاقستاندىقتار العا شىعىپ، جەڭىستى ج ۇلىپ الدى – 80:77. بۇل – اعىمداعى ازياداداعى العاشقى جەڭىس. ءبىزدىڭ كوماندا ساپىنداعى ەڭ ناتيجەلى ويىنشى – 22 ۇپاي جيناعان قورعاۋشى اناستاسيا اليشاۋسكايتە.
ازيا ويىندارى-2026. باسكەتبول. ايەلدەر. ا توبى: يندونەزيا – تايلاند 61:52، جۇڭگو – تايلاند 111:46، جۇڭگو – يندونەزيا 110:41. ورنى: 1. جۇڭگو – 4، 2. يندونەزيا – 2، 3. تايلاند – 2.
ۆ توبى: فيليپپين – قازاقستان 88:55، جاپونيا – گونكونگ 114:37، فيليپپين – گونكونگ 90:73، جاپونيا – قازاقستان 88:23، قازاقستان – گونكونگ 80:77 وت. ورنى: 1. جاپونيا – 4، 2. فيليپپين – 4، 3. قازاقستان – 4، 4. گونكونگ – 3.
س توبى: وڭتۇستىك كورەيا – مالايزيا 106:40، جۇڭگو تايبەيى – موڭعوليا 76:67، وڭتۇستىك كورەيا – موڭعوليا 88:61، جۇڭگو تايبەيى – مالايزيا 98:59. ورنى: 1. وڭتۇستىك كورەيا – 4، 2. جۇڭگو تايبەيى – 4، 3. موڭعوليا – 2، 4. مالايزيا – 2.
پلەي-وففقا ءۇش توپتىڭ ءارقايسىسىنان ەكى ۇزدىك كوماندا، سونداي-اق ءۇشىنشى ورىن العان ءۇش قۇرامانىڭ ەكەۋى شىعادى. وسىلايشا، ءۇشىنشى ساتىدا تۇرعان قازاقستاندىقتاردىڭ شيرەك فينالعا شىعۋ مۇمكىندىگى ءالى دە بار. ءبىزدىڭ كوماندانىڭ تۋرنيرلىك تاعدىرى توپتىق كەزەڭنىڭ قورىتىندى ماچتارىنىڭ ناتيجەلەرىنە بايلانىستى.
ازيادا تاريحىندا ايەلدەر باسكەتبولىنان التىندى تەك ءۇش ەل – جۇڭگو، وڭتۇستىك كورەيا جانە جاپونيا جەڭىپ العان. قازاقستان قۇراماسى ءتورت رەت بەسىنشى ورىندى يەلەندى (1994، 1998، 2014، 2018). وتكەن ازيا ويىندارىندا قىزدارىمىز 12-ورىنعا تۇراقتاعان، ال جەڭىمپاز قىتايلىقتار بولدى.
ويىنداردىڭ رەسمي اشىلۋى 19 قىركۇيەكتە ءوتتى. 45 ەلدىڭ سپورتشىلارى قاتىساتىن كەشەندى جارىستاردا 460 مەدال جيىنتىعى ساراپقا سالىنادى: 217 – ەرلەر اراسىندا، 204 – ايەلدەر اراسىندا جانە 39 – ارالاس رازريادتاردا. ازيادا-2026-دا قازاقستان قۇراماسى ساپىندا 35 سپورت تۇرىنەن 558 سپورتشى ونەر كورسەتەدى.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. ەكىنشى كۇننەن كەيىن قازاقستان بەيرەسمي كوماندالىق ەسەپتە ءتورتىنشى ورىندا تۇر.