قازاقستاننىڭ بوكستان قۇراماسىنىڭ ترەنەرلىك شتابى جاپونيادا وتەتىن XX جازعى ازيا ويىندارىنا قاتىساتىن قۇرامدى انىقتادى، دەپ حابارلايدى infohub.kz سايتى.
تۋرنيرگە قازاقستاندىق 11 بوكسشى قاتىسادى – التى ەر جانە بەس ايەل. ەرلەر قۇراماسىنىڭ باس باپكەرى نۇرجان ناسانوۆ كەلەسى سپورتشىلاردى تاڭدادى: ماحمۇد سابىرحان (55 كگ)، ورازبەك اسىلقۇلوۆ (60 كگ)، تورەحان سابىرحان (70 كگ)، سابىرجان اققالىقوۆ (80 كگ)، نۇربەك ورالباي (90 كگ) جانە ايبەك ورالباي (90 كگ-دان جوعارى).
ەرلەر قۇراماسىنىڭ كوپشىلىگى ءولان-باتوردا وتكەن ازيا چەمپيوناتى-2026-دا ءساتتى ونەر كورسەتتى. اسىلقۇلوۆ، اققالىقوۆ، نۇربەك جانە ايبەك ورالباي قۇرلىق چەمپيوندارى اتاندى، تورەحان سابىرحان كۇمىس، ال ماحمۇد سابىرحان قولا جۇلدەگە يە بولدى.
بۇعان دەيىن قازاقستاننىڭ ايەلدەر قۇرامى جاريالانعان بولاتىن. ايەلدەر ۇلتتىق قۇراماسىنىڭ باس باپكەرى ەلدوس ءسايداليننىڭ شەشىمىمەن ازيا ويىندارىنا: الۋا بالقىبەكوۆا (51 كگ)، نازىم قىزايباي (54 كگ)، ۆيكتوريا گرافەەۆا (60 كگ)، ايدا ابىكەەۆا (65 كگ) جانە ناتاليا بوگدانوۆا (75 كگ) اتتانادى.
بوكستان تۋرنيردە بارلىعى 11 جۇلدە جيىنتىعى ويناتىلادى – ەرلەردە التى، ايەلدەردە بەس. قازاقستان ازيادا وليمپيادالىق باعدارلامانىڭ ءار سالماق دارەجەسىندە سپورتشىمەن ۇسىنىلادى.
بوكستان جارىستار 21 قىركۇيەكتە باستالادى. جارتىلاي فينالدىق جەكپە-جەكتەر 29 جانە 30 قىركۇيەكتە، ال بارلىق فينالدار 2 قازاندا وتەدى.
XX جازعى ازيا ويىندارى جاپونيادا 2026 جىلدىڭ 19 قىركۇيەگى مەن 4 قازانى ارالىعىندا وتەدى. تۋرنير باعدارلاماسىنا 71 ءپان بىرىكتىرەتىن 43 سپورت ءتۇرى ەنگىزىلگەن. 469 جۇلدە جيىنتىعىن ويناتۋ جوسپارلانۋدا.
الدىڭعى ازيا ويىندارىندا حانچجوۋدا قازاقستان قۇراماسى 80 جۇلدەمەن – 10 التىن، 22 كۇمىس جانە 48 قولا – جارىستى اياقتاپ، جالپى مەدال ەسەبىندە 11ء-شى ورىنعا يە بولدى.