قازاقستاننىڭ مۇناي وڭدەۋ زاۋىتتارى 2026 جىلى اي-92 بەنزينىن رەسەي فەدەراسياسىنا جونەلتكەن جوق. بۇل تۋرالى تاسس اگەنتتىگىنە قازاقستان رەسپۋبليكاسىنىڭ ەنەرگەتيكا مينيسترلىگى مالىمدەدى، دەپ حابارلايدى infohub.kz سايتى.
ۆەدومستۆو اتاپ وتكەندەي، وتىن ەكسپورتى ءتيىستى حالىقارالىق كەلىسىمدەرگە قول جەتكىزىلگەن جاعدايدا عانا جانە ىشكى نارىق قاجەتتىلىگى تولىق قامتاماسىز ەتىلگەندە مۇمكىن بولادى.
«ەكسپورتتىق كولەمدى ىسكە اسىرۋ ءتيىستى حالىقارالىق كەلىسىمدەرگە قول جەتكىزۋ، سونداي-اق قازاقستان رەسپۋبليكاسىنىڭ ىشكى نارىعىنىڭ قاجەتتىلىكتەرىن ءسوزسىز قامتاماسىز ەتۋ شارتىمەن جۇزەگە اسىرىلادى. وسىعان بايلانىستى 2026 جىلى قازاقستان رەسپۋبليكاسىنىڭ مۇناي وڭدەۋ زاۋىتتارىنان اي-92 اۆتوموبيل بەنزينىن رەسەي فەدەراسياسىنا جونەلتۋ جۇرگىزىلگەن جوق»، — دەپ كەلتىرەدى تاسس ەنەرگەتيكا مينيسترلىگىنىڭ حابارلاماسىن.
تامىز ايىنىڭ سوڭىندا Reuters سالاداعى ءتورت دەرەككوزگە سىلتەمە جاساپ، ءىرى قازاقستاندىق مۇناي وڭدەۋ زاۋىتتارىنىڭ شىلدە-تامىز ايلارىنا بولىنگەن اي-92 بەنزينىن رەسەيگە ەكسپورتتاۋ كۆوتالارىن پايدالانباعانىن حابارلاعان بولاتىن.
قازاقستاننان بەنزين شىعارۋ كولىكتىڭ بارلىق تۇرىمەن تىيىم سالىنعان. شەكتەۋ ىشكى نارىقتى قانىقتىرۋ جانە كورشى ەلدەردەگى باعانىڭ قىمباتتىعى اياسىندا وتىندى زاڭسىز شىعارۋدىڭ جولىن كەسۋ ءۇشىن ەنگىزىلگەن ەدى. ەرەكشەلىك تەك كولىك قۇرالىنىڭ شتاتتىق باگىنداعى وتىنعا عانا قولدانىلادى.
بۇعان دەيىن «كۋرسيۆ» 25 تامىزدا ەنەرگەتيكا ءمينيسترى ەرلان اقكەنجەنوۆ قازاقستاننان بەنزيننىڭ رەسمي ەكسپورتى جوق ەكەنىن مالىمدەگەنىن جازعان. سونىمەن قاتار ول «وتىن ءتۋريزمى» دەپ اتالاتىن شەڭبەردە شەكارا ارقىلى شىعارىلاتىن وتىن كولەمىن باعالاۋ ءىس جۇزىندە مۇمكىن ەمەس ەكەنىن اتاپ وتكەن.