قازاقستاننىڭ ەرلەر گاندبول قۇراماسى جاپونياداعى ازيا ويىندارىنداعى العاشقى ويىنىن باحرەين كومانداسىنان ءىرى ەسەپپەن — 20:43 (8:20) جەڭىلىسپەن باستادى. بۇل تۋرالى infohub.kz سايتى حابارلايدى.
تۋرنيردەگى العاشقى گولىن قازاقستاندىقتار 0:3 ەسەبىمەن ارتتا قالعان كەزدە سوقتى. ءبىراز ۋاقىت ايىرماشىلىق سونشالىقتى ۇلكەن كورىنبەدى، الايدا ءبىرىنشى تايمنىڭ سوڭىنا قاراي قارسىلاس 12 گولعا وزىپ كەتتى — 20:8.
ۇزىلىستەن كەيىن ويىننىڭ بارىسى وزگەرگەن جوق. باحرەين مۇقالماي گول سوعىپ جاتتى، قازاقستاندىقتاردىڭ قولىنان بۇل الدەقايدا سيرەك كەلدى. قازىرگى تاڭدا كوماندالاردىڭ گاندبول شەبەرلىگى دەڭگەيى، وكىنىشكە قاراي، سالىستىرۋعا كەلمەيدى. قورىتىندى 20:43 ەسەبى — سونىڭ ايقىن دالەلى.
ازيا ويىندارى-2026. گاندبول. ەرلەر. ۆ توبى: كۋۆەيت — يران 26:24، قازاقستان — باحرەين 20:43.
گاندبولشىلار ءتۋرنيرىنىڭ فورمۋلاسى وزگەشە. توعىز كوماندا ەكى توپقا بولىنگەن. ا توبىنىڭ تورتتىگىنەن (كاتار، جاپونيا، جۇڭگو، گونكونگ) پلەي-وففقا بارلىق كوماندا شىعادى. ۆ توبىنىڭ بەستىگىنەن (كۋۆەيت، باحرەين، وڭتۇستىك كورەيا، يران، قازاقستان) — تورتەۋى.
وسىلايشا، شيرەك فينالعا جەتۋ ءۇشىن ءبىزدىڭ كومانداعا توپتا سوڭعى ورىننان ءبىر ساتى جوعارى تۇرۋ جەتكىلىكتى. راس، بۇل جاعدايدا ول ا توبىنىڭ ءبىرىنشى كومانداسىمەن كەزدەسەدى. الايدا وسى ارىپپەن بەلگىلەنگەن توپتاعى كەز كەلگەن قارسىلاس ايتارلىقتاي مىقتى.
22 قىركۇيەكتە ماحسادبەك نارمەتوۆ شاكىرتتەرى كۋۆەيتپەن، 23ء-ى كۇنى يرانمەن، 24ء-ى كۇنى وڭتۇستىك كورەيامەن سىنعا تۇسەدى.
قازاقستاندىق گاندبولشىلار وسى ۋاقىتقا دەيىن ازيا ويىندارىنىڭ جۇلدەگەرلەر قاتارىنا ەنبەگەن. ال جيىرەك جەڭىسكە وڭتۇستىك كورەيا قۇراماسى جەتىپ ءجۇردى.
جاپونياداعى XX جازعى ازيا ويىندارى كەشە، 19 قىركۇيەكتە رەسمي تۇردە اشىلدى. 45 ەلدىڭ سپورتشىلارى قاتىساتىن كەشەندى جارىستاردا 460 مەدال جيىنتىعى ساراپقا سالىنادى: 217ء-سى — ەرلەر اراسىندا، 204ء-ى — ايەلدەر اراسىندا جانە 39-ى — ارالاس رازريادتاردا. تۋرنيرلەر 41 سپورت ءتۇرىنىڭ 68 ديسيپليناسىندا وتەدى.
ازيادا-2026-دا قازاقستان قۇراماسىنىڭ ساپىندا 559 سپورتشى ونەر كورسەتەدى. 20 قىركۇيەكتە ترياتلونشى ارلان جاناباي قولا جۇلدە الىپ، قازاقستانعا ازيادا-2026-نىڭ العاشقى مەدالىن سىيلادى. بۇگىن ۆەلوشاباندوز ريناتا سۋلتانوۆا جەكەلەي بولەك ستارتتىق جارىستا التىن جەڭىپ الدى.