قازاقستاندىق مەرگەن ۆالەري راحيمجان ازيا ويىندارى-2026-نىڭ فينالىندا 10 مەتردەن پنەۆماتيكالىق تاپانشادان اتۋدان بەسىنشى ورىن الدى. شەشۋشى راۋندتا ول 177،6 ۇپاي جينادى، دەپ حابارلايدى infohub.kz سايتى.
جارىس جەڭىمپازى وزبەكستاندىق ۆلاديمير سۆەچنيكوۆ بولدى — 244،3 ۇپاي. بۇل ازيا ويىندارىنىڭ رەكوردى. كۇمىستى جۇڭگو وكىلى حۋ كاي 243،0 ۇپايمەن جەڭىپ الدى، ال ونىڭ وتانداسى بۋ شۋايحان 222،1 ۇپايمەن ءۇشىنشى ورىنعا تۇراقتادى.
ازيا ويىندارى-2026
24 قىركۇيەك. وق اتۋ. پنەۆماتيكالىق تاپانشا، 10 م. ەرلەر. فينال
🥇 1. ۆلاديمير سۆەچنيكوۆ (وزبەكستان) – 244،3
🥈 2. حۋ كاي (جۇڭگو) – 243،0
🥉 3. بۋ شۋايحان (جۇڭگو) – 222،1
…5. ۆالەري راحيمجان (قازاقستان) – 177،6
راحيمجان شەشۋشى راۋندقا ىرىكتەۋ كەزەڭىندە ءتورتىنشى ورىنمەن ءوتتى. قازاقستاندىق تاعى ەكى مەرگەن — كيريلل فەدكين مەن ەلدار يمانكۋلوۆ — سايكەسىنشە 33ء-شى جانە 57ء-شى ورىنداردى يەلەنىپ، فينالعا شىعا المادى.
ىرىكتەۋ ناتيجەلەرى كوماندالىق ەسەپكە دە جاتتى. قازاقستان 1705 ۇپايمەن ونىنشى ورىن الدى. جۇڭگو مەن يندونەزيا 1743 ۇپايدان جينادى، الايدا قىتايلىق مەرگەندەر ورتالىق وندىققا كوبىرەك تيگىزگەنىنىڭ ارقاسىندا ءبىرىنشى ورىنعا شىقتى — 70-كە قارسى 57. جاپونيا 1730 ۇپايمەن ءۇشىنشى ورىنعا تۇراقتادى.
الدىڭعى كۇنى ايەلدەر تۋرنيرىندە قازاقستان دا فينالدا وكىلدىك ەتتى. ۆالەريا پوپەلوۆا جەتىنشى ورىن الدى. قازاقستاننىڭ ايەلدەر قۇراماسى كوماندالىق ەسەپتە دە ونىنشى بولدى.
جاپونياداعى XX جازعى ازيا ويىندارى 19 قىركۇيەكتە رەسمي تۇردە اشىلدى. 45 ەلدىڭ سپورتشىلارى قاتىساتىن جارىستا 460 مەدال كومپلەكتىسى ساراپقا سالىنۋدا. ازيادا-2026-دا قازاقستان قۇراماسىنىڭ ساپىندا 35 سپورت تۇرىنەن 558 سپورتشى ونەر كورسەتۋدە.
ازيادا-2026 شولۋلارى: 1-كۇن، 2-كۇن، 3-كۇن، 4-كۇن.