جاپونيادا ءوتىپ جاتقان ازيادا-2026 ويىندارىندا قازاقستاندىق سپورتشىلار 10 مەتر قاشىقتىقتان پنەۆماتيكالىق ۆينتوۆكادان اتۋ جارىسىنىڭ فينالىنا وتە المادى، دەپ حابارلايدى infohub.kz سايتى.
قۇراما ساپىنداعى ەڭ ۇزدىك ناتيجەنى الەكساندرا لە كورسەتتى: ىرىكتەۋ كەزەڭىندە ول 628،5 ۇپاي جيناپ، 15-ورىنعا تۇراقتادى.
ەليزاۆەتا بەزرۋكوۆا 626،8 ۇپايمەن 22-ورىندى يەلەنسە، سوفيا شۋلجەنكو 624،6 ۇپايمەن 28-ساتىدان كورىندى. ەسكە سالايىق، ىرىكتەۋ قورىتىندىسى بويىنشا ۇزدىك سەگىز سپورتشى عانا فينالعا جولداما الاتىن.
ىرىكتەۋ حاتتاماسىن جۇڭگو سپورتشىسى ۆان سزىفەي باستادى – 636،8 ۇپاي. ەكىنشى ورىندى وڭتۇستىك كورەيا وكىلى بان ءحو دجين – 634،9 ۇپايمەن السا، ءۇشىنشى ساتىنى ءۇندىستاننان كەلگەن سونام ۋتتام ماسكار – 634،1 ۇپايمەن تۇيىندەدى.
كوماندالىق ەسەپتە قازاقستان قۇراماسىنىڭ ناتيجەسى لە، بەزرۋكوۆا جانە شۋلجەنكو كورسەتكىشتەرىنەن قۇرالدى. ءبىزدىڭ سپورتشىلار 1879،9 ۇپاي جيناپ، التىنشى ورىنعا تۇراقتادى.
كوماندالىق جارىستا التىندى جۇڭگو – 1904،2 ۇپايمەن جەڭىپ الدى، كۇمىس ءۇندىستانعا (1898،0) بۇيىرسا، قولا جاپونياعا (1897،1) تيەسىلى بولدى.
بۇعان دەيىن 20 قىركۇيەكتە ترياتلونشى ارلان جاناباي قولا جۇلدە الىپ، قازاقستانعا ازيادا-2026 ويىندارىنداعى العاشقى مەدالىن سىيلاعان ەدى. كەيىن ۆەلوسپورتشى ريناتا سۋلتانوۆا جەكەلەي بولەك ستارتتىق جارىستا التىنعا قول جەتكىزدى.
جاپونياداعى XX جازعى ازيا ويىندارى كەشە، 19 قىركۇيەكتە رەسمي تۇردە اشىلدى. 45 ەلدىڭ سپورتشىلارى قاتىساتىن كەشەندى جارىستاردا 460 مەدال جيىنتىعى ساراپقا سالىنادى: 217ء-سى – ەرلەر اراسىندا، 204ء-ى – ايەلدەر اراسىندا جانە 39-ى – ارالاس رازريادتاردا. تۋرنيرلەر 41 سپورت ءتۇرىنىڭ 68 ديسيپليناسىندا وتەدى. ازيادا-2026 ويىندارىندا قازاقستان قۇراماسىنىڭ نامىسىن 559 سپورتشى قورعايدى.