جاپونيادا ءوتىپ جاتقان ازيادا-2026 ويىندارىندا قازاقستاننىڭ سۋ دوبىنان ايەلدەر قۇراماسى سينگاپۋر كومانداسىن 12:7 (2:2، 3:1، 4:3، 3:1) ەسەبىمەن جەڭىپ، ءتۋرنيردى سەنىمدى باستادى. ۆاتەرپولو ءتۋرنيرىنىڭ العاشقى ماچى قازاقستاندىقتاردىڭ پايداسىنا شەشىلدى، دەپ حابارلايدى infohub.kz سايتى.
ءبىرىنشى كەزەڭنىڭ اياقتالۋىنا ءۇش مينۋت قالعاندا ءبىزدىڭ قىزدار العاش رەت العا شىقتى — 2:1. الايدا ۇزىلىسكە دەيىن سينگاپۋر ەسەپتى تەڭەستىرىپ ۇلگەردى. ەكىنشى شيرەكتەن كەيىن قازاقستاندىقتار 5:3 ەسەبىمەن الدا بولدى. ماچتىڭ ەكىنشى جارتىسىندا چەرنوگوريالىق مامان زوران ماسلوۆاردىڭ شاكىرتتەرى باسىمدىلىقتى ودان ءارى ارتتىرىپ، ماڭىزدى جەڭىسكە جەتتى — 12:7. ءتورت گولدان ورتالىق ويىنشى ولگا ۆورونسوۆا مەن كوماندا كاپيتانى، درايۆەر اناستاسيا ميرشينا ەنشىلەپ الدى.
ازيادانىڭ ايەلدەر ۆاتەرپولو تۋرنيرىنە التى كوماندا قاتىسۋدا. جەڭىمپاز بەن جۇلدەگەرلەر ءبىر اينالىمدىق تۋرنير قورىتىندىسى بويىنشا انىقتالادى. تاعى ەرتەڭ قازاقستاندىقتار جاپونيا قۇراماسىمەن وينايدى، ول ستارتتا تايلاندتى 27:7 ەسەبىمەن ويسىراتا جەڭدى. 22 قىركۇيەكتە ءبىزدىڭ قىزدار تايلىقتارمەن، 23-ىندە تۋرنير ءفاۆوريتى قىتايمەن جانە 24-ىندە وزبەكستانمەن كەزدەسەدى.
ازيادا-2026-دا قازاقستاننىڭ ايەلدەر قۇراماسى ساپىندا الەكساندرا جاركيمباەۆا، الينا وزكايا، اناستاسيا ميرشينا، اناستاسيا سوي، اننا نوۆيكوۆا، ۆالەريا انوسوۆا، ۆيكتوريا كاپلۋن، داريا پوچينوك، ەليزاۆەتا رۋدنەۆا، كاميلا ناۋرىزباەۆا، مادينا راحمانوۆا، ماريا مارتىنەنكو، ميلەنا نابيەۆا، ولگا ۆورونسوۆا جانە يۋليا درۋجينينا ونەر كورسەتەدى.
ايەلدەر اراسىنداعى سۋ دوبى ءتۋرنيرى ازيا ويىندارىندا بار-جوعى ءتورتىنشى رەت وتكىزىلىپ وتىر. بۇعان دەيىنگى بارلىق جارىستاردا قىتايلىقتار جەڭىمپاز اتانعان. قازاقستاندىقتار ەكى رەت ۆيسە-چەمپيون (2010، 2018) جانە ەكى رەت قولا جۇلدەگەر (2014، 2022) بولدى.
جاپونياداعى XX جازعى ازيا ويىندارى كەشە، 19 قىركۇيەكتە رەسمي تۇردە اشىلدى. 45 ەلدىڭ سپورتشىلارى قاتىساتىن كەشەندى جارىستاردا 460 مەدال جيىنتىعى ساراپقا سالىنادى: 217ء-سى ەرلەر اراسىندا، 204ء-ى ايەلدەر اراسىندا جانە 39-ى ارالاس رازريادتاردا. تۋرنيرلەر 41 سپورت ءتۇرىنىڭ 68 ديسيپليناسىندا وتەدى.
ازيادا-2026-دا قازاقستان قۇراماسىنىڭ ساپىندا 559 سپورتشى ونەر كورسەتەدى. بۇگىن قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتيستەر جولامان بيگابىل مەن سوفيا بەرۋلسەۆا.