قازاقستان ەرلەر تەننيس قۇراماسىنىڭ كاپيتانى دياس دوسكارايەۆ استانادا وتكەن ماچ الدىنداعى ءباسپاسوز ءماسليحاتىندا دەۆيس كۋبوگىنىڭ الەمدىك ەكىنشى توبىنىڭ پلەي-وفف كەزەڭىندە تايلاندقا قارسى ويىنعا كوماندانىڭ دايىندىعى تۋرالى ايتتى، دەپ حابارلايدى infohub.kz سايتى.
دوسكاراەۆتىڭ ايتۋىنشا، قازاقستان قۇراماسى جەڭىسكە جەتۋدى جانە الەمدىك تەننيس ەليتاسىنا ورالۋدى ماقسات ەتىپ وتىر. سونىمەن قاتار كاپيتان كوماندانىڭ قارسىلاسقا بايىپتى قارايتىنىن جانە جەڭىل ويىن كۇتپەيتىنىن اتاپ ءوتتى.
ءباسپاسوز ءماسليحاتىنىڭ باستى تاقىرىپتارىنىڭ ءبىرى قۇرامدا الەكساندر بۋبليكتىڭ بولماۋى بولدى. دوسكارايەۆ كوماندانى جاساقتاۋ كەزىندە تەك الداعى ماچ مىندەتتەرى عانا ەمەس، قۇرامانىڭ ۇزاق مەرزىمدى پەرسپەكتيۆالارى دا ەسكەرىلگەنىن ءتۇسىندىردى.
«ءبىز تيموفەي سكاتوۆقا سەنىم ارتىپ وتىرمىز جانە ول قۇراما ساپىنداعى تابىستى ونەر كورسەتۋ سەرياسىن جالعاستىرادى دەپ ۇمىتتەنەمىز. ەگەر قۇرامعا الەكساندر بۋبليك ەنگىزىلسە، ول ءسوزسىز وسى ويىندا ونەر كورسەتەر ەدى، الايدا بۇل جاعدايدا تيموفەي سكاتوۆتىڭ جەكەلەي رازريادتا قاتىسۋ مۇمكىندىگى شەكتەلەر ەدى. ءبىز تەك ءبىر ناقتى ماچ تۋرالى عانا ەمەس، ۇلتتىق كوماندانىڭ بولاشاعى تۋرالى دا ويلاۋىمىز كەرەك»، — دەپ ءتۇسىندىردى دوسكارايەۆ.
كاپيتان سونداي-اق جەكەلەي كەزدەسۋلەردە الەكساندر شەۆچەنكو مەن تيموفەي سكاتوۆتىڭ كانديداتۋرالارى قاراستىرىلىپ جاتقانىن حابارلادى. قۇرام بويىنشا تۇپكىلىكتى شەشىم ويىن باستالار تۇستا قابىلدانادى.
ەسكە سالايىق، قازاقستان — تايلاند ماچى 18–19 قىركۇيەكتە استاناداعى Beeline Arena ۇلتتىق تەننيس ورتالىعىنىڭ كورتتارىندا وتەدى. قازاقستان كومانداسىنىڭ قۇرامىنا الەكساندر شەۆچەنكو، دەنيس ەۆسەيەۆ، تيموفەي سكاتوۆ، بەيبىت جۇقايەۆ جانە ءامىر ومارحانوۆ ەندى.
ويىننىڭ جەڭىمپازى دەۆيس كۋبوگىنىڭ ءبىرىنشى الەمدىك توبىندا ونەر كورسەتۋ قۇقىعىنا يە بولادى.