قازاقستاننىڭ ايەلدەر ۆولەيبول قۇراماسى ازيا ويىندارىنىڭ قازىرگى چەمپيونى — جۇڭگو كومانداسىنا 0:3 (18:25، 6:25، 14:25) ەسەبىمەن جول بەرىپ، جاپونيادا ءوتىپ جاتقان ازيادادا ۆ توبىندا ەكىنشى ورىنعا تۇراقتادى، دەپ حابارلايدى infohub.kz سايتى.

بۇل كەزدەسۋگە دەيىن ەكى كوماندا دا فيليپپين قۇراماسىن جەڭىپ، شيرەك فينالعا جولداماسىن قامتاماسىز ەتكەن بولاتىن. وسىلايشا، قازاقستان — جۇڭگو ماچىندا توپتاعى ءبىرىنشى ورىن تاعدىرى شەشىلدى.

قازاقستاندىق ۆولەيبولشىلاردىڭ قارسىلاستارى — ءۇش دۇركىن وليمپيادا چەمپيونى، ەكى دۇركىن الەم چەمپيونى، بەس دۇركىن الەم كۋبوگىنىڭ يەگەرى، 18 دۇركىن ازيا چەمپيونى جانە توعىز دۇركىن ازيا ويىندارىنىڭ جەڭىمپازى. قىتايلىقتاردىڭ ۆولەيبولى عارىشتىق دەڭگەيدە ەكەنى تاڭعالارلىق ەمەس.

ەكىنشى پارتيادا قارسىلاستار اسقار شالكيبەكوۆتىڭ شاكىرتتەرىنە نەبارى التى ۇپاي جيناۋعا مۇمكىندىك بەردى. ءبىرىنشى جانە ءۇشىنشى سەتتەردە قازاقستاندىق كوماندا قارسىلىق كورسەتۋگە تىرىستى، ءبىراق جەرگىلىكتى تابىستارمەن شەكتەلدى.

قورىتىندى — 60 مينۋت ىشىندە 0:3. قازاقستان توپتا ەكىنشى، جۇڭگو ءبىرىنشى ورىنمەن مارەگە جەتتى.

جۇڭگو مەن قازاقستاننان بولەك پلەي-وفف جولداماسىن جاپونيا، يندونەزيا، تايلاند، جۇڭگو تايبەيى، وڭتۇستىك كورەيا جانە ۆەتنام جەڭىپ الدى. شيرەك فينال جۇپتارى رەسمي تۇردە ازىرگە جاريالانعان جوق. بۇل كەزەڭنىڭ ماچتارى 20 قىركۇيەكتە وتەدى.

ازيا ويىندارى-2026. ۆولەيبول. ايەلدەر.

ا توبى: جاپونيا — نەپال 3:0، يندونەزيا — نەپال 3:0. ورنى: 1. جاپونيا — 3، 2. يندونەزيا — 3، 3. نەپال — 0.

ۆ توبى: جۇڭگو — فيليپپين 3:0، قازاقستان — فيليپپين 3:1، جۇڭگو — قازاقستان 3:0. ورنى: 1. جۇڭگو — 6، 2. قازاقستان — 3، 3. فيليپپين — 0.

س توبى: تايلاند — موڭعوليا 3:0، جۇڭگو تايبەيى — قىرعىزستان 3:0، جۇڭگو تايبەيى — موڭعوليا 3:0، تايلاند — قىرعىزستان 3:0. ورنى: 1. تايلاند — 6، 2. جۇڭگو تايبەيى — 6، 3. قىرعىزستان — 0، 4. موڭعوليا — 0.

D توبى: ۆەتنام — كاتار 3:0، وڭتۇستىك كورەيا — گونكونگ 3:0، وڭتۇستىك كورەيا — كاتار 3:0، ۆەتنام — گونكونگ 3:0، گونكونگ — كاتار 3:0. ورنى: 1. وڭتۇستىك كورەيا — 6، 2. ۆەتنام — 6، 3. گونكونگ — 3، 4. كاتار — 0.

جاپونياداعى XX جازعى ازيا ويىندارى رەسمي تۇردە 19 قىركۇيەكتە اشىلادى. 45 ەلدىڭ سپورتشىلارى قاتىساتىن كەشەندى جارىستاردا 460 مەدال كومپلەكتىسى ساراپقا سالىنادى: 217ء-سى — ەرلەر اراسىندا، 204ء-ى — ايەلدەر اراسىندا جانە 39-ى — ارالاس رازريادتاردا. تۋرنيرلەر 41 سپورت ءتۇرىنىڭ 68 ديسيپليناسىندا وتەدى.

ازيادا-2026-دا قازاقستان قۇراماسىنىڭ ساپىندا 559 سپورتشى ونەر كورسەتەدى.