قازاقستاننىڭ ەرلەر ۆولەيبول قۇراماسى ازيادا-2026 ويىندارىنداعى العاشقى كەزدەسۋىن پاكىستان كومانداسىنان 1:3 (16:25، 22:25، 25:17، 20:25) ەسەبىمەن ۇتىلىپ باستادى. سەرگەي تريكوز شاكىرتتەرى ءبىر عانا پارتيانى الا الدى، قالعان سەتتەردە قارسىلاس باسىم بولىپ، لايىقتى جەڭىسكە جەتتى، دەپ حابارلايدى infohub.kz سايتى.
ەرلەر ۆولەيبول ءتۋرنيرىنىڭ فورماتى 16 كوماندانى ءتورت توپقا ءبولۋدى كوزدەيدى. پلەي-وففقا ءار توپتان ەكى ۇزدىك قۇراما شىعادى.
باستاپقى كەزدەسۋدەگى كۇتپەگەن جەڭىلىستەن كەيىن قازاقستان قۇراماسىنىڭ توپتان شىعۋ مۇمكىندىگى ايتارلىقتاي تومەندەدى. ەندى قازاقستاندىقتار 28 قىركۇيەكتە جاپونيانى، 29 قىركۇيەكتە وزبەكستاندى مىندەتتى تۇردە جەڭۋى كەرەك. الايدا ازيالىق ۆولەيبولداعى ءۇردىس بەلگىلەۋشى تۋرنير قوجايىندارىمەن ماچتاعى تابىس ىقتيمالدىعى از بولىپ تۇر.
ازيادا-2026. ۆولەيبول. ەرلەر. ا توبى: جاپونيا، پاكىستان، قازاقستان، وزبەكستان. ۆ توبى: يران، قىرعىزستان، يندونەزيا، تايلاند. س توبى: كاتار، گونكونگ، ءۇندىستان، ۆەتنام. D توبى: وڭتۇستىك كورەيا، جۇڭگو، جۇڭگو تايبەيى، فيليپپين.
ازيادالاردا ەرلەر ۆولەيبول ءتۋرنيرى 1958 جىلدان بەرى وتكىزىلىپ كەلەدى. ونى جيىرەك جاپوندىقتار جەڭىپ العان. قازاقستان قۇراماسى ءالى كۇنگە دەيىن جۇلدەگەرلەر قاتارىنا قوسىلعان ەمەس.
XX جازعى ازيا ويىندارى رەسمي تۇردە 19 قىركۇيەكتە اشىلدى جانە 4 قازاندا اياقتالادى. 45 ەلدىڭ سپورتشىلارى قاتىساتىن جارىستاردا 460 مەدال جيىنتىعى ساراپقا سالىنۋدا. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى ونەر كورسەتۋدە.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى مما سايىسكەرى ەركىنعالي بۇركىتالين قوستى. التىنشىنى — ونىڭ ارالاس جەكپە-جەك كومانداسىنداعى سەرىكتەسى قادىربەك شىنبايەۆ. 23 قىركۇيەكتە لۋسەنكو اي-2026-نىڭ ەكى دۇركىن چەمپيونى اتاندى. سەگىزىنشى جوعارى سىناقتاعى مەدالدى 24 قىركۇيەكتە ەرلەر اراسىنداعى جۇپتىق ەسۋ سايىسىندا ۆلاديسلاۆ ياكوۆليەۆ پەن يۆان چەرنۋحين جەڭىپ الدى. ياسمينا توقسانباەۆا بۇگىن مارافوندىق ءجۇرىس سايىسىندا توعىزىنشى التىندى جەڭىپ الدى.
ويىنداردىڭ جەتى كۇنىنەن كەيىن قازاقستان بەيرەسمي مەدال ەسەبىندە بەسىنشى ورىندا تۇر.