2026 جىلعى 13 قازاننان باستاپ قازاقستاندا جەدەل مەديسينالىق جاردەم كورسەتۋدىڭ جاڭا ەرەجەلەرى كۇشىنە ەندى: ەندى ازاماتتار بريگادانىڭ قوزعالىسىن كارتادان ونلاين رەجيمدە باقىلاي الادى، دەپ حابارلايدى infohub.kz سايتى.
دەنساۋلىق ساقتاۋ مينيسترلىگىنىڭ بۇيرىعىنا سايكەس، «جەدەل مەديسينالىق جاردەم شاقىرۋ» مەملەكەتتىك قىزمەتىن الۋ ءۇشىن قازاقستاندىقتار «103» نومىرىنە قوڭىراۋ شالۋى نە گەولوكاسياسىن كورسەتىپ، ءموبيلدى قوسىمشالاردى — مەسسەندجەرلەر مەن چات-بوتتاردى پايدالانۋى قاجەت.
بريگادا تاعايىندالعان سوڭ، مەديسينالىق ۇيىم پاسيەنتتى اۆتوماتتى تۇردە حاباردار ەتىپ، وعان دارىگەرلەردىڭ قوزعالىسىن ناقتى ۋاقىت رەجيمىندە باقىلاۋ مۇمكىندىگىن بەرۋگە مىندەتتى.
سونىمەن قاتار، جەدەل جاعدايلارداعى شاقىرتۋلاردى جەدەل جاردەم ستانسيالارىنىڭ ديسپەچەرلەرى ەمحانالاردىڭ — العاشقى مەديسينالىق-سانيتارلىق كومەك (امسك) ۇيىمدارىنىڭ بريگادالارىنا جىبەرەدى. قايتا باعىتتاۋ ەمحانالاردىڭ جۇمىس ۋاقىتىندا عانا ىستەيدى: جۇمىس كۇندەرى ساعات 08:00-دەن 19:00-گە دەيىن، سەنبىدە 08:00-دەن 12:00-گە دەيىن. ال ەمحانا دارىگەرلەرىنىڭ وزدەرى مۇنداي شاقىرتۋلاردى جۇمىس كۇندەرى ساعات 08:00-دەن 20:00-گە دەيىن ورىندايدى.
ەگەر جەدەل شاقىرتۋ جەكسەنبىدە نەمەسە ەمحانالاردىڭ جۇمىس ىستەمەيتىن ۋاقىتىندا تۇسسە، پاسيەنتكە جەدەل جاردەم ستانسياسىنىڭ قالىپتى بريگاداسى بارادى.
ەسكە سالايىق، 2024 جىلدىڭ كۇزىندە دەنساۋلىق ساقتاۋ مينيسترلىگىنىڭ جەدەل مەديسينالىق جاردەم شاقىرۋعا قاتىستى جاڭا تۇزەتۋلەرى توڭىرەگىندە جانجال تۋىنداعان ەدى. ول كەزدە الەۋمەتتىك جەلىلەردە بريگادالار شۇعىلدىقتىڭ IV ساناتىنداعى — جەڭىل جاراقات، جوعارى قىزبا نەمەسە قان قىسىمىنىڭ كۇرت وزگەرۋى كەزىندەگى — شاقىرتۋلارعا تۇندە جانە دەمالىس كۇندەرى بارمايدى دەگەن اقپارات تاراعان بولاتىن.
تۋىنداعان قوعامدىق رەزونانسقا بايلانىستى مينيسترلىك رەسمي تۇسىنىكتەمە بەرۋگە ءماجبۇر بولدى. ۆەدومستۆونىڭ ءباسپاسوز حاتشىسى ايگەرىم ورازاليەۆا بۇيرىق جوباسىنىڭ ءتۇسىندىرىلۋى قاتە بولعانىن مالىمدەگەن ەدى. دەنساۋلىق ساقتاۋ مينيسترلىگى «103» نومىرىنە قوڭىراۋ شالعاندا شاقىرتۋ ساناتىنا قاراماستان دارىگەرلىك كومەك تولىق كولەمدە كورسەتىلەتىنىن، ال جۇمىس ۋاقىتىندا ەمحانالاردىڭ ءموبيلدى بريگادالارىن تارتۋ قىزمەت جۇمىسىنىڭ جەدەلدىگىن ارتتىرۋعا عانا باعىتتالعانىن ايتقان.
بۇعان دەيىن «كۋرسيۆ» قازاقستاندا جەدەل جاردەم تاۋلىگىنە شامامەن 25 مىڭ ءوتىنىش قابىلدايتىنىن جازعان بولاتىن.