قازاقستاندىق شوۋ-بيزنەس وكىلدەرى كاسپيدە قازا تاپقان جاس اسكەريلەردىڭ وتباسىلارىنا كوڭىل ايتىپ، قايعىلارىن ءبىلدىردى، دەپ حابارلايدى infohub.kz سايتى.
پروديۋسەر، اكتەر جانە كۆن ويىنشىسى نۇرلان قويانبايەۆ بۇل قايعىلى وقيعا بارشا قازاقستاندىقتى ءدۇر سىلكىندىرگەنىن اتاپ ءوتتى. «وتان الدىنداعى بورىشىن وتەپ، ەل تىنىشتىعىن قورعاعان اسكەريلەردىڭ ءولىمىن ءبارىمىز اۋىر قابىلدادىق. قازا تاپقانداردىڭ وتباسىنا، تۋعان-تۋىستارىنا شىن جۇرەكتەن كوڭىل ايتامىن. بۇل قاسىرەتتىڭ سەبەبى اشىق ءارى ءادىل تەكسەرىلۋى كەرەك»، — دەپ جازدى نۇرلان Instagram-دا.
اكتريسا جانە ءانشى جانار ايجانوۆا دا الەۋمەتتىك جەلىدە جازبا قالدىردى. «جاس اسكەريلەردىڭ جانى ءجانناتتا بولسىن. قايعىدان قان جۇتقان انالارعا، ۇلدارىنان ايىرىلعان اكەلەرگە، تۋعان-تۋىستارىنا كوڭىل ايتامىز. بالالارىنىڭ ورالۋىن كۇتكەن جانداردىڭ قانشاما ءۇمىتى ءسوندى. ءبىراق ەشتەڭەنى وزگەرتۋ مۇمكىن ەمەس. قايعىلارىڭدى بولىسەمىز، قىمباتتىلار»، — دەپ جازدى ول.
اكتريسا اينۇر ءىلسوۆا دا قازا تاپقانداردىڭ وتباسىلارىنا كوڭىل ايتتى. «بۇگىن قازاقستاندا ماڭعىستاۋ وبلىسىنداعى اسكەريلەردىڭ قازا بولۋىنا بايلانىستى جالپىۇلتتىق ازا تۇتۋ جاريالاندى. قازا تاپقانداردىڭ وتباسىنا، تۋعان-تۋىستارىنا تەرەڭ كوڭىل ايتامىز. وسى ورنى تولماس قايعىنى كوتەرۋگە كۇش پەن توزىمدىلىك تىلەيمىز. يماندى بولسىن»، — دەپ جازدى ول.
ءانشى التىناي جوراباەۆا بۇل بارشا قازاقستاندىق ءۇشىن ورنى تولماس قازا ەكەنىن اتاپ ءوتتى. «ءومىرى قىزعان شاعىندا ۇزىلگەن ساربازدارىمىزدىڭ اتا-انالارىنا، تۋعان-تۋىستارىنا ەڭ تەرەڭ كوڭىل ايتامىز»، — دەپ جازدى ول.
ورىنداۋشى اقبوتا كەرىمبەكوۆا دا قايعى جەتكەن وتباسىلاردىڭ قاسىرەتىن ءبولىستى. «اقتاۋدا قازا تاپقان اسكەريلەردىڭ وتباسىنا اللاھ سابىر بەرسىن. ەل قورعاۋعا اتتانعان جاستاردىڭ قازا بولۋى — بارشامىز ءۇشىن ورنى تولماس قازا. ولاردىڭ جاقىندارىنىڭ قايعىسىن ءبولىسىپ، كوڭىل ايتامىز»، — دەلىنگەن ونىڭ جازباسىندا.
اكتەر دانيار حيزمەتوۆ الەۋمەتتىك جەلىدە جاريالانىم جاساپ، قازا تاپقاندارعا قايعىرىپ كوڭىل ايتتى. «ەلىمىزدەگى قورقىنىشتى وقيعا. قازا تاپقانداردىڭ وتباسىنا كوڭىل ايتامىز. بۇل تۋرالى ايتۋ، تۇسىنىك بەرۋ، وي قورىتۋ قيىن. اللاھ ءار ادامنىڭ ءومىرىن قورعاسىن»، — دەدى ول.
سونداي-اق تولقىن زابيروۆا، ءلايلا سۇلتان قىزى، اشا ماتاي، جەڭىس يسكاكوۆا، ساكەن مايعازييەۆ، ەركە ەسماحان، RaiM، يرينا تەن جانە باسقا دا شوۋ-بيزنەس جۇلدىزدارى كوڭىل ايتتى.
ەسكە سالايىق، 24 قىركۇيەكتە وقۋ-جاۋىنگەرلىك تاپسىرمانى ورىنداۋ بارىسىندا اۋا رايىنىڭ كەنەتتەن ناشارلاۋى مەن ەكپىندى جەلدىڭ سالدارىنان كاسپي تەڭىزىنە 17 اسكەري قىزمەتشى اعىزىلىپ كەتكەن. ۇشەۋى قۇتقارىلىپ، 14ء-ى قازا تاپتى. بۇگىن قازاقستاندا جالپىۇلتتىق ازا تۇتۋ كۇنى.