ونكولوگيالىق اۋرۋلارعا قارسى وتاندىق DVC پرەپاراتى ەكىنشى كەزەڭدەگى كلينيكالىق سىناقتاردان ءوتىپ جاتىر. بارلىق راسىمدەر بەلگىلەنگەن مەرزىمدە اياقتالسا، ءدارى قازاقستاندا كەلەسى جىلى تىركەلۋى مۇمكىن، دەپ حابارلايدى infohub.kz.
عىلىم جانە جوعارى ءبىلىم ءمينيسترى ساياسات نۇربەك ۇكىمەتتەگى بريفينگتە: «مۇندا ءدال وسى دوزا، اعزانىڭ ۇلكەن دوزاعا، كىشى دوزاعا رەاكسياسى تۋرالى بولىپ وتىر. وسى جىلدىڭ سوڭىنا دەيىن بارلىق سىناقتاردى اياقتاپ، ءدارىنى الدىن الا تىركەۋگە ءوتىنىم بەرۋگە تىرىسامىز»، — دەدى.
سىناقتار اياقتالعاننان كەيىن ناتيجەلەر ساراپتامادان ءوتۋى كەرەك، سودان كەيىن پرەپارات مەملەكەتتىك تىركەۋگە جىبەرىلۋى مۇمكىن. نۇربەكتىڭ ايتۋىنشا، ازىرلەۋشىلەر تىركەۋ الدىنداعى سوڭعى ساتىدا تۇر.
الدىمەن پرەپاراتتى قازاقستاندا جانە ەۋرازيالىق ەكونوميكالىق وداق ەلدەرىندە قولدانۋ ءۇشىن تىركەۋ جوسپارلانۋدا. باسقا نارىقتارعا شىعۋ ءۇشىن ءتيىستى مەملەكەتتەردىڭ ەرەجەلەرىنە سايكەس جەكە تىركەۋ قاجەت بولادى.
الايدا، 2025 جىلى دا پرەپاراتتى جىل سوڭىنا دەيىن تىركەۋ جوسپارلانعانىن، ءبىراق بۇل ورىندالماعانىن ەسكەرۋ كەرەك، سوندىقتان كىدىرىستەر بولۋى مۇمكىن.
وتاندىق DVC پرەپاراتىنىڭ ادامدارعا كلينيكالىق سىناقتارى 2026 جىلدىڭ ناۋرىز ايىندا باستالدى. بۇعان دەيىن ازىرلەۋشىلەر جانۋارلارعا جۇرگىزىلگەن دوكلينيكالىق زەرتتەۋلەردىڭ ءساتتى اياقتالعانىن حابارلاعان بولاتىن. مامىر ايىندا ساياسات نۇربەك ادامدارعا جۇرگىزىلگەن سىناقتاردىڭ ءبىرىنشى كەزەڭى اياقتالعانىن مالىمدەدى: زەرتتەۋگە قاتىسقانداردىڭ بارلىعى ءتىرى، ال پاسيەنتتەردىڭ شامامەن 30% ىسىكتەردىڭ كىشىرەيگەنى بايقالدى.
ءقازىر ماماندار پرەپاراتتىڭ وڭتايلى دوزاسىن انىقتاپ، پاسيەنتتەردىڭ ءارتۇرلى دوزالارعا رەاكسياسىن باعالاۋدا. ازىرگە تەك كلينيكالىق سىناقتار تۋرالى ايتىلىپ وتىر. ءدارى تىركەلگەنگە دەيىن قاۋىپسىزدىك، ساپا جانە تيىمدىلىكتى باعالاۋدىڭ بەلگىلەنگەن راسىمدەرىنەن ءوتۋى ءتيىس.