عىلىم جانە جوعارى ءبىلىم ءمينيسترى ساياسات نۇربەك ۇكىمەتتەگى بريفينگتە قازاقستاندىق ونكولوگيالىق اۋرۋلارعا قارسى پرەپاراتتى ازىرلەۋگە قاتىستى جاڭا مالىمەتتەردى ايتتى. ونىڭ ايتۋىنشا، ءقازىر استاناداعى ونكولوگيالىق ورتالىقتا كلينيكالىق سىناقتاردىڭ ەكىنشى كەزەڭى جالعاسۋدا، دەپ حابارلايدى infohub.kz سايتى.
ۆەدومستۆو باسشىسى اتاپ وتكەندەي، بۇل كەزەڭدە ماماندار پاسيەنتتەر اعزاسىنىڭ پرەپاراتتىڭ ءارتۇرلى مولشەرىنە رەاكسياسىن زەرتتەپ، وڭتايلى دوزانى انىقتايدى. «ءبىز وسى جىلدىڭ سوڭىنا دەيىن ءبارىن اياقتاپ، پرەپاراتتى الدىن الا تىركەۋگە ۇسىنۋعا تىرىسامىز. ونىڭ ءوز پروسەدۋراسى بار. دەنساۋلىق ساقتاۋ مينيسترلىگى جانىنداعى دارىلىك زاتتاردى تىركەۋ ۇلتتىق ورتالىعى ءقازىر بىزگە بارىنشا كومەكتەسىپ جاتىر. ولار كلينيكالىق سىناقتاردىڭ ەكىنشى كەزەڭىنىڭ راستالعان ناتيجەلەرىن كۇتۋدە. ءبىز ولاردى راستاعان بويدا جۇكتەيمىز، ءبارى قايتا تەكسەرىلەدى دە، پرەپاراتتى تىركەۋگە ۇسىنا باستايمىز. بۇل — سوڭعى الدىنداعى قادام، ءبىز ءقازىر سوندا تۇرمىز»، — دەپ اتاپ ءوتتى نۇربەك.
مينيستر ودان ءارى جوسپارلار تۋرالى دا ايتتى: الدىمەن پرەپاراتتى قازاقستان اۋماعىندا رەسمي تىركەۋ جوسپارلانۋدا، سودان كەيىن ەۋرازيالىق ەكونوميكالىق وداقتا، ال ودان كەيىن پرەپاراتتى حالىقارالىق نارىققا شىعارۋ جۇمىستارى باستالادى.
بۇعان دەيىن ساياسات نۇربەك قازاقستاندىق قاتەرلى ىسىككە قارسى ءدارىنى 2026 جىلدىڭ سوڭىنا دەيىن تىركەۋگە بولاتىنىن مالىمدەگەن ەدى.