قازاقستاندا حالىققا قىزمەت كورسەتۋ ورتالىقتارىنا جۇگىنۋ سانى ايتارلىقتاي ازايدى: وپەراتورلارعا قاتىناۋ 30%-عا قىسقاردى. بۇل تۋرالى ۇكىمەت وتىرىسىندا پرەمەر-مينيستردىڭ ورىنباسارى – جاساندى ينتەللەكت جانە سيفرلىق دامۋ ءمينيسترى جاسلان مادييەۆ مالىمدەدى، دەپ حابارلايدى infohub.kz.
ماديەۆتىڭ ايتۋىنشا، ەڭ سۇرانىسقا يە قىزمەتتەردىڭ ونلاين-فورماتقا اۋىسۋى ازاماتتاردىڭ حقكو-عا جەكە بارۋ قاجەتتىلىگىن ەداۋىر تومەندەتتى. اتاپ ايتقاندا، ءقازىر ەلەكتروندى تۇردە كولىك قۇرالدارىن العاشقى تىركەۋ، جەر ۋچاسكەلەرىنە اكتىلەر بەرۋ جانە جىلجىمايتىن م ۇلىككە كاداسترلىق پاسپورتتار الۋ قولجەتىمدى.
«ەسق بەرۋ، تۇرعىلىقتى جەرى بويىنشا تىركەلۋ بۇكىل ەل بويىنشا تولىعىمەن دەرلىك ونلاين جۇزەگە اسىرىلادى. ادام حقكو-عا كەلسە دە، وعان وپەراتوردىڭ كومەگى ءجيى قاجەت ەمەس. ول قىزمەتتى وزىنە-وزى قىزمەت كورسەتۋ ايماعىندا دەربەس الادى»، — دەپ اتاپ ءوتتى مينيستر.
ول سونداي-اق حقكو تۇجىرىمداماسى قايتا قارالعانىن حابارلادى. «جاڭا AI حالىققا قىزمەت كورسەتۋ ءوفيسى 70/20/10 قاعيداتى بويىنشا ءۇش ايماقتان تۇرادى. جالپى اۋداننىڭ 70%-ىن الاتىن نەگىزگى ەكسپرەسس-ايماقتا قىزمەتتەردى eGov GPT سيفرلىق كومەكشىسى بار تەرمينالدار ارقىلى ءوز بەتىنشە الۋعا بولادى. سونداي-اق كەڭسەدە كەلۋشىگە كەڭەسشى قولجەتىمدى ساراپتامالىق جانە وقىتۋ ايماقتارى بار»، — دەدى مادييەۆ.
العاشقى مۇنداي وفيس ماۋسىم ايىندا جەزقازعاندا اشىلدى، كەيىن تۇركىستان، استانا جانە ساتبايەۆ قالالارىندا پايدا بولدى. ءمينيستردىڭ ايتۋىنشا، سيفرلىق كەڭسەلەر ءقازىردىڭ وزىندە 4 مىڭنان استام ادامعا قىزمەت كورسەتكەن.