2026 جىلدىڭ ەكىنشى توقسانىندا تابىسى ەڭ تومەنگى كۇنكورىس دەڭگەيىنەن تومەن قازاقستاندىقتاردىڭ ۇلەسى 5%-عا جەتتى. بۇل ءبىرىنشى توقسانداعى كورسەتكىشتەن جوعارى، ءبىراق بىلتىرعىمەن سالىستىرعاندا تومەن: ەلدە 172 518 ءۇي شارۋاشىلىعىندا تۇراتىن 1 ميلليون 34 مىڭ از قامتىلعان ازامات تىركەلدى، دەپ حابارلايدى infohub.kz سايتى.

جاڭارتىلعان دەرەكتەردى ۇلتتىق ستاتيستيكا بيۋروسى جاريالادى. ولارعا سايكەس، 2026 جىلدىڭ ەكىنشى توقسانىنىڭ قورىتىندىسى بويىنشا تابىسى ەڭ تومەنگى كۇنكورىس دەڭگەيىنەن تومەن حالىقتىڭ ۇلەسى 5%-دى قۇرادى. بۇل ءبىرىنشى توقسانداعىدان (4،9%) كوپ، ءبىراق 2025 جىلدىڭ ەكىنشى توقسانىنداعىدان (5،1%) از.

بارلىعى ەلدە تابىسى ەڭ تومەنگى كۇنكورىس دەڭگەيىنەن تومەن 172 518 از قامتىلعان ءۇي شارۋاشىلىعى تىركەلدى، ولاردا 1 034 000 ادام تۇرادى.

سونىمەن قاتار، قازاقستاندا تابىسى ازىق-ت ۇلىك سەبەتىنىڭ قۇنىنان تومەن بولعان، ياعني وتباسىنىڭ ءار مۇشەسىنە شاققاندا ەڭ تومەنگى كۇنكورىس دەڭگەيىنىڭ 55%-ىنا جەتپەگەن 5 697 ءۇي شارۋاشىلىعىنداعى 34 506 ادام بار.

ەسكە سالايىق، 2026 جىلدىڭ ەكىنشى توقسانىندا ەل بويىنشا ورتاشا ەڭ تومەنگى كۇنكورىس دەڭگەيى ادام باسىنا ايىنا 67 618 تەڭگەنى قۇرادى.

وڭىرلەر بولىنىسىندە ەڭ جوعارى كەدەيلىك دەڭگەيى تۇركىستان وبلىسىندا تىركەلدى — 8،4%. ودان كەيىن 7،6% كورسەتكىشىمەن اباي وبلىسى تۇر، ال ۇشتىكتى جەتىسۋ وبلىسى 7،2%-بەن قورىتىندىلايدى.

شىمكەنتتە كەدەي حالىقتىڭ ۇلەسى 5،3%، الماتىدا — 4،1%، ال استانادا — 2،9%، بۇل ەلدەگى ەڭ تومەن كورسەتكىش.

ايتا كەتەيىك، كەدەيلىك دەڭگەيى مەن قازاقستاندىقتار تۇراتىن جەر اراسىندا بايلانىس بايقالادى. قالالاردا كورسەتكىش ايتارلىقتاي تومەن — ورتاشا ەسەپپەن 3،7%، ال اۋىلداردا — 7،4%.

اقتوبە وبلىسىنىڭ اۋىلدىق اۋداندارىندا ەڭ جوعارى كەدەيلىك دەڭگەيى تىركەلدى — 11%. ودان كەيىن تۇركىستان وبلىسى — 10%. ال قاراعاندى وبلىسىنىڭ اۋىل تۇرعىندارى «ەڭ جاقسى» ءومىر سۇرەدى — مۇندا كورسەتكىش نەبارى 4%.

ەكىنشى توقساندا ەڭ تومەن كەدەيلىك دەڭگەيى شىعىس قازاقستان وبلىسىنىڭ قالالارىندا بولدى — ورتاشا ەسەپپەن نەبارى 1،7%.

بۇعان دەيىن ءبىز قازاقستاندىقتاردىڭ شىعىستارى مەن كىرىستەرىنىڭ قايسىسى جىلدامىراق ءوسىپ جاتقانىن اڭگىمەلەگەن ەدىك. سونداي-اق جاقىندا الەۋمەتتىك جەلىلەردە الماتىلىقتاردى تابىسىنا قاراي «كەدەيلەردەن» «ميلليونەرلەرگە» دەيىنگى ساناتتارعا بولەتىن كىرىس شكالاسى رەزونانس تۋدىردى.