بريتاندىق بوكسشى حامزا شيراز ەكىنشى ورتا سالماقتاعى دۇنيەجۇزىلىك بوكس ۇيىمىنىڭ (WBO) مىندەتتى تيتۋلىن قازاقستاندىق جانىبەك ءالىمحان ۇلىنا قارسى قورعاۋدان باس تارتىپ، چەمپيوندىق بەلبەۋىن ءوز ەركىمەن بوساتتى. بۇل تۋرالى WBO رەسمي تۇردە حابارلادى، دەپ جازادى infohub.kz سايتى.
ۇيىم شيرازدىڭ مۇددەسىن قورعايتىن Queensberry Promotions كومپانياسى پروموۋتەرلىك ساۋدا-ساتتىق اياقتالعان سوڭ بوكسشىنىڭ شەشىمى تۋرالى WBO-عا جازباشا حابارلاعانىن راستادى.
«حامزا شيراز رەسمي ۇمىتكەر جانىبەك ءالىمحان ۇلىنا قارسى مىندەتتى قورعاۋعا بايلانىستى پروموۋتەرلىك ساۋدا-ساتتىق قورىتىندىسىندا قالىپتاسقان شارتتاردى قاراستىرىپ، بۇل جەكپە-جەكتى وتكىزبەۋگە شەشىم قابىلدادى جانە ەكىنشى ورتا سالماقتاعى WBO الەم چەمپيونى تيتۋلىنان ءوز ەركىمەن باس تارتتى»، – دەلىنگەن ۇيىم مالىمدەمەسىندە.
WBO شيراز بەن ونىڭ كومانداسىنىڭ شەشىمىن قۇرمەتتەيتىنىن جەتكىزدى. ۇيىمنىڭ چەمپيوندىق كوميتەتى بوس بەلبەۋ مارتەبەسى مەن ديۆيزيونداعى احۋالعا قاتىستى كەلەسى شەشىمدى دۇيسەنبىدە، 21 قىركۇيەكتە جاريالايدى.
بۇعان دەيىن Queensberry Promotions شيراز – ءالىمحان ۇلى جەكپە-جەگىن ۇيىمداستىرۋ قۇقىعى ءۇشىن ساۋدا-ساتتىقتا 1 001 809 دوللار ۇسىنىپ جەڭىسكە جەتكەن. قازاقستاندىقتىڭ مۇددەسىن قورعايتىن Top Rank 820 مىڭ دوللار ستاۆكا جاساعان. جەكپە-جەكتىڭ ىقتيمال كۇندەرى رەتىندە 28 قاراشا مەن 5 جەلتوقسان اتالسا، وتكىزىلەتىن ورىندار رەتىندە ۇلىبريتانيا مەن نيۋ-يورك قاراستىرىلعان.
ايتا كەتەيىك، شيراز ساۋدا-ساتتىققا دەيىن-اق WBO-نىڭ ءالىمحان ۇلىن مىندەتتى ۇمىتكەر ەتىپ تاعايىنداۋىنا نارازىلىق بىلدىرگەن. ال قازاقستاندىق بولسا، كەرىسىنشە، جەكپە-جەككە دايىن ەكەنىن بىرنەشە رەت مالىمدەپ، باستى ماقساتى – چەمپيوندىق بەلبەۋ ەكەنىن اتاپ وتكەن.
شيرازدىڭ باس تارتۋى ءالىمحان ۇلىن اۆتوماتتى تۇردە چەمپيون ەتپەيدى. قازاقستاندىق رەسمي مىندەتتى ۇمىتكەر كۇيىندە قالادى، ال WBO بەلبەۋىنە اپارار جولدى ۇيىمنىڭ چەمپيوندىق كوميتەتى 21 قىركۇيەكتە ايقىندايدى.
WBO رەگلامەنتىنە سايكەس، بوس تيتۋل ۇيىم سانكسيالاعان جەكپە-جەكتە ساراپقا سالىنۋى ءتيىس. كوميتەت قولجەتىمدى ەكى ۇزدىك ۇمىتكەردى انىقتاپ، ولارعا كەلىسسوز جۇرگىزۋ ءۇشىن 30 كۇنگە دەيىن ۋاقىت بەرەدى. كەلىسىمگە كەلە الماسا، WBO پروموۋتەرلىك ساۋدا-ساتتىق تاعايىنداي الادى. وسىلايشا، ەندى ۇيىم بوساتقان بەلبەۋ ءۇشىن الىمحان ۇلىمەن كەزدەسۋ قۇقىعىن كىم الاتىنىن انىقتاۋى كەرەك.
تامىزدا WBO قازاقستاندىق ورتا سالماقتان ەكىنشى ورتا سالماققا اۋىسقان سوڭ ءالىمحان ۇلىن شيرازدىڭ تيتۋلىنا رەسمي مىندەتتى ۇمىتكەر دەپ تانىعان. بۇعان دەيىن جانىبەك 72،6 كگ-عا دەيىنگى سالماقتا WBO جانە IBF چەمپيوندىق بەلبەۋلەرىن يەلەنگەن.
ءالىمحان ۇلى كاسىبي رينگتە جەڭىلىس كورمەگەن – 17 جەڭىس، ونىڭ 12ء-سى نوكاۋتپەن. شيرازدىڭ ەنشىسىندە – 24 جەڭىس، ءبىر تەڭ ويىن جانە 19 نوكاۋت.