«مەرسەدەس» كومانداسىنىڭ يتالياندىق پيلوتى كيمي انتونەللي «فورمۋلا-1» يسپانيا گران-پريىندە جەڭىسكە جەتتى. بۇل جارىس مادريدتە جاڭا Madring قالالىق تراسساسىندا العاش رەت ءوتتى، دەپ حابارلايدى infohub.kz سايتى.
20 جاستاعى گونششيك ەكىنشى پوزيسيادان ستارت الدى. جارىس بارىسىندا ول ۆيرتۋالدى قاۋىپسىزدىك كولىگىنىڭ جاعدايىن جانە پيت-ستوپ كەزىندە كوش باستاعان لاندو ءنورريستىڭ ۋاقىت جوعالتۋىن ءتيىمدى پايدالاندى. ناتيجەسىندە انتونەللي العا شىعىپ، مارەگە دەيىن كوشباسشىلىقتى ساقتاپ قالدى.
ەكىنشى ورىندى «رەد بۋلل» كومانداسىنىڭ ءتورت دۇركىن الەم چەمپيونى ماكس فەرستاپپەن يەلەندى. ۇشتىكتى «ماكلارەن» اتىنان قازىرگى الەم چەمپيونى لاندو نورريس تۇيىندەدى. ءتورتىنشى بولىپ «فەرراري» پيلوتى شارل لەكلەر مارەگە جەتتى، ال انتونەلليدىڭ «مەرسەدەستەگى» سەرىكتەسى دجوردج راسسەلل بەسىنشى ورىنعا تۇراقتادى.
انتونەللي ءۇشىن بۇل جەڭىس اعىمداعى «فورمۋلا-1» ماۋسىمىنداعى سەگىزىنشى جەڭىسى بولدى. سونىمەن قاتار يتالياندىق جاڭا Madring تراسساسىندا الەم چەمپيوناتى كەزەڭىنىڭ العاشقى جەڭىمپازى رەتىندە تاريحقا ەندى.
يسپانيا گران-پريىنەن كەيىن انتونەللي الەم چەمپيوناتىنىڭ جەكە ەسەبىندە كوشباسشىلىعىن نىعايتتى. ەندى يتالياندىقتىڭ قورجىنىندا 292 ۇپاي بار. ەكىنشى ورىندا 211 ۇپايمەن دجوردج راسسەلل تۇر. جالپى ەسەپتە ءۇشىنشى بولىپ 191 ۇپاي جيناعان ليۋيس حەميلتون كەلە جاتىر.