قىتايدىڭ يۋننان پروۆينسياسىنىڭ اكىمشىلىك ورتالىعى كۋنمين قالاسىنداعى حيميالىق كاسىپورىندا ءورت شىعىپ، 1200-دەن استام ادام ەۆاكۋاسيالاندى. جانىپ جاتقان كەزدە اتموسفەراعا تىتىركەندىرگىش بۋلار شىققانىن infohub.kz سايتى حابارلايدى.
وقيعا 4 تامىزدا سزيننين اۋدانىنداعى Yunnan Haoming Fine Phosphorus Chemical Company زاۋىتىندا بولدى. جەرگىلىكتى بيلىكتىڭ مالىمەتىنشە، ءورت جەرگىلىكتى ۋاقىت بويىنشا ساعات 11:50 شاماسىندا سارى فوسفور تيەۋ كەزىندە باستالعان. وقيعا ورنىندا بولعان بارلىق 1257 ادام ەۆاكۋاسيالاندى. قازا تاپقاندار مەن زارداپ شەككەندەر تۋرالى حابارلانبادى.
ءورت سول كۇنى كەشكى ساعات 22:00 شاماسىندا تولىعىمەن ءسوندىرىلدى. رەسمي حابارلامادا «اپات سارى فوسفوردىڭ تۇتانۋىنا اكەلدى، ال جانۋ كەزىندە پايدا بولعان ءتۇتىن مەن شاڭ ماڭايداعى اۋدانداردا اۋا ساپاسىنىڭ قىسقا مەرزىمدى ناشارلاۋىن تۋدىردى» دەلىنگەن. بيلىك مۇنداي بۋلار مەن ءتۇتىندى جۇتۋ كوزدىڭ، مۇرىننىڭ جانە تىنىس الۋ جولدارىنىڭ تىتىركەنۋىن تۋدىرۋى مۇمكىن ەكەنىن ەسكەرتتى.
وقيعادان كەيىن كاسىپورىن وندىرىستىك جانە شارۋاشىلىق قىزمەتىن توقتاتتى. «كومپانيا ءوندىرىس پەن شارۋاشىلىق قىزمەتىن توقتاتتى. بيلىك ەكولوگيالىق مونيتورينگ پەن باعالاۋدى جالعاستىرۋدا. ءورتتىڭ سەبەپتەرى تەرگەلۋدە»، — دەپ حابارلادى جەرگىلىكتى بيلىك.