كوكشەتاۋدا 23 جاستاعى جەرگىلىكتى تۇرعىن Mercedes-Benz كولىگىن جالپىعا ورتاق جولدا دريفت جاساپ، اكىمشىلىك جاۋاپكەرشىلىككە تارتىلدى. ءتارتىپ بۇزۋشىلىق پروفيلاكتيكالىق ءىس-شارالار بارىسىندا انىقتالدى. بۇل تۋرالى اقمولا وبلىسى پوليسيا دەپارتامەنتى حابارلادى، دەپ جازادى infohub.kz سايتى.
پوليسيانىڭ مالىمەتىنشە، جۇرگىزۋشى جولدى بۇلدىرگەنى جانە مانەۆر جاساۋ ەرەجەلەرىن بۇزعانى ءۇشىن جازالاندى. وعان 7 ايلىق ەسەپتىك كورسەتكىش مولشەرىندە — 30 مىڭ تەڭگەدەن استام اكىمشىلىك ايىپپۇل سالىندى. سونىمەن قاتار بۇزۋشىمەن پروفيلاكتيكالىق اڭگىمە جۇرگىزىلدى.
وبلىستىق پوليسيا دەپارتامەنتى جىل باسىنان بەرى دريفت جاساعانى ءۇشىن 24 جۇرگىزۋشى اكىمشىلىك جاۋاپكەرشىلىككە تارتىلعانىن قوستى.
اۆتوكولىك اۋەسقويلارىنا ەسكەرتىلدى: «قالا جولىنداعى دريفت تەك سىرتتان قاراعاندا اسەرلى كورىنۋى مۇمكىن. ءىس جۇزىندە مۇنداي مانەۆرلەر ناقتى ءقاۋىپ توندىرەدى. كولىك باسقارۋدان شىعىپ، قارسى جولاققا شىعىپ كەتۋى نەمەسە باسقا قوزعالىس قاتىسۋشىلارىمەن سوقتىعىسۋى ىقتيمال. جاياۋ جۇرگىنشىلەر مەن باسقا كولىكتەر جاقىن جەردە ورنالاسقان تۇستاردا مۇنداي جاعدايلار اسىرەسە ءقاۋىپتى».