10 تامىزدا كولۋمبيادا بولعان جويقىن جەر سىلكىنىسىنەن قازا تاپقاندار سانى 200-دەن استى، دەپ حابارلايدى infohub.kz سايتى.
CNN دەرەكتەرىنە سايكەس، قۇرباندار سانى كەمىندە 224 ادامعا جەتتى. ەلدىڭ گەولوگيالىق قىزمەتى ماگنيتۋداسى 7،4 بولعان نەگىزگى دۇمپۋدەن كەيىن 70-تەن استام كەيىنگى ءدۇمپۋ تىركەدى. قۇتقارۋشىلار ەڭ كوپ زارداپ شەككەن اۋدانداردا ۇيىندىلەردى تازالاپ، قيراندى استىندا قالعان ادامدارعا جەتۋگە تىرىسۋدا.
اقش مەملەكەتتىك دەپارتامەنتى كولۋمبياعا تابيعي اپاتتارعا ارەكەت ەتۋ توبىن (DART) جىبەرەتىنىن مالىمدەدى. بۇل توپ ماڭىزدى وپەراسيالاردى قولداپ، توتەنشە جاعداي كەزىندە ۇكىمەتتىڭ ءىس-قيمىلىن ۇيلەستىرەدى. مەكسيكا ۇكىمەتى دە زارداپ شەككەن ەلگە ىزدەۋ-قۇتقارۋ جۇمىستارىنا ماماندانعان 255 اسكەري قىزمەتكەر مەن گۋمانيتارلىق كومەك جىبەرۋگە دايىندالۋدا.
ەسكە سالايىق، 10 تامىزدا كولۋمبيادا ماگنيتۋداسى 7،4 جەر سىلكىنىسى بولدى. سول كۇنى كەشكە 30 ادام قازا تاپقانى حابارلانعان ەدى، ال 11 تامىز تاڭەرتەڭ قۇرباندار سانى 132-گە جەتىپ، تاعى 570 ادام جاراقات الدى. ەل ۇكىمەتى ۇلتتىق دەڭگەيدە توتەنشە جاعداي جاريالاپ، زارداپ شەككەن اۋداندارعا اسكەري قىزمەتكەرلەردى جىبەردى. قازاقستان پرەزيدەنتى قاسىم-جومارت توقايەۆ ستيحيادان كوپتەگەن ادام قازا تابۋىنا بايلانىستى كولۋمبيا پرەزيدەنتىنە كوڭىل ايتۋ جەدەلحاتىن جولدادى.