قازاقستان پوليسياسى جۇرگىزۋشىلەردى باقىلاۋ ءۇشىن سيفرلىق تەحنولوگيالاردى كەڭىنەن قولدانۋدا. ەندى جولداردا ۇشقىشسىز ۇشاقتار، پاترۋلدىك كولىكتەردەگى ءموبيلدى كەشەندەر، ورتاشا جىلدامدىقتى باقىلاۋ جانە لازەرلىك جۇيەلەر قولدانىلادى، دەپ حابارلايدى infohub.kz.
پوليسيا قولداناتىن قۇرالداردىڭ ءبىرى – ۇشقىشسىز ۇشاقتار. ولاردىڭ كومەگىمەن ينسپەكتورلار جول قوزعالىسىن باقىلاپ، ءتارتىپ بۇزۋشىلىقتاردى اۋەدەن تىركەيدى.
ءىىم اكىمشىلىك پوليسيا كوميتەتى ءتوراعاسىنىڭ ورىنباسارى باعلانبەك ايتپاەۆتىڭ ايتۋىنشا، بۇل جۇيە تەك قۇقىق بۇزۋشىلاردى جازالاۋعا عانا ەمەس، ءقاۋىپتى جاعدايلارعا تەزىرەك دەن قويۋعا مۇمكىندىك بەرەدى.
«جىلدامدىقتى جاقسى كورەتىندەر مەن ورەسكەل بۇزۋشىلار ەندى جاۋاپكەرشىلىكتەن قاشىپ قۇتىلا المايدى، ويتكەنى بۇزۋشىلىقتار اۋەدەن تىركەلەدى»، – دەدى ايتپايەۆ.
پاترۋلدىك كولىكتەردەگى ءموبيلدى كەشەندەر ءتارتىپ بۇزۋشىلىقتاردى تىكەلەي اعىندا انىقتاۋعا مۇمكىندىك بەرەدى. پوليسيانىڭ مالىمەتىنشە، ولاردىڭ كومەگىمەن رۋلدە تەلەفون پايدالانۋ، جاياۋ جۇرگىنشىلەردى وتكىزبەۋ، جىلدامدىقتى اسىرۋ جانە مانەۆر جاساۋ ەرەجەلەرىن بۇزۋ دەرەكتەرى انىقتالادى.
قالا سىرتىنداعى تراسسالاردا جىلدامدىقتى جاقسى كورەتىن جۇرگىزۋشىلەرگە ورتاشا جىلدامدىقتى باقىلاۋ ەنگىزىلگەنىن ەسكەرتەمىز. ءقازىر بۇل جۇيە رەسپۋبليكالىق ماڭىزى بار 12 نەگىزگى باعىتتا جۇمىس ىستەيدى، سوندىقتان كامەرا الدىندا عانا تەجەۋ فيكساسيادان قۇتىلۋعا كومەكتەسپەيدى.
جول-كولىك وقيعالارىنىڭ الدىن الۋ ءۇشىن پوليسيا لازەرلىك جۇيەلەردى دە قولدانادى، اسىرەسە تۇندە جانە قولايسىز اۋا رايىندا. ولار سونداي-اق جۇرگىزۋشىنىڭ زەيىنى تومەندەپ، رۋلدە ۇيىقتاپ كەتۋ ءقاۋپى تۋىنداعان جاعدايلاردا دا قولدانىلادى.
كەيبىر جولداردا بيلىك جۇرگىزۋشىلەردى جىلدامدىقتى ازايتىپ، جولدى مۇقيات قاداعالاۋعا ماجبۇرلەۋ ءۇشىن جولدىڭ ءجۇرۋ بولىگىن تارىلتۋدا. ءىىم مۇنداي شارالار كەشەنى اپاتتىلىقتى ازايتىپ، جول قوزعالىسىن ءقاۋىپسىز ەتۋگە كومەكتەسەدى دەپ سانايدى.