شىعىس قازاقستان وبلىسىندا ازاماتتىق تۋرالى زاڭنامانى بۇزعانى ءۇشىن 35 ادام اكىمشىلىك جاۋاپكەرشىلىككە تارتىلدى، دەپ حابارلايدى infohub.kz.
وبلىستىق پوليسيا دەپارتامەنتىنىڭ مالىمەتىنشە، جىل باسىنان بەرى 550-دەن استام ازامات قازاقستان ازاماتتىعىنان ايىرىلدى. ولاردىڭ كوپشىلىگى باسقا مەملەكەتتەردىڭ ازاماتتىعىن قابىلداعان. سونىمەن قاتار، كەيبىرەۋلەر الەۋمەتتىك، زەينەتاقى جانە وزگە دە مەملەكەتتىك جەڭىلدىكتەردى ساقتاپ قالۋدى كوزدەپ، ەلگە كىرۋ جانە تۇرۋ ءۇشىن قازاقستاندىق قۇجاتتاردى پايدالانۋدى جالعاستىرۋدا.
ازاماتتىق سالاسىنداعى بۇزۋشىلىقتار ءۇشىن 35 ادام اكىمشىلىك جاۋاپكەرشىلىككە تارتىلدى. 26 جاعدايدا ازاماتتار شەتەل ازاماتتىعىن العانى تۋرالى بەلگىلەنگەن مەرزىمدە حابارلاماعان، تاعى 9-ى قازاقستان رەسپۋبليكاسىنىڭ پاسپورتىن نەمەسە جەكە كۋالىگىن پايدالانۋدى جالعاستىرعان.
وسىنداي جاعدايلاردىڭ ءبىرىن كوشى-قون قىزمەتى قىزمەتكەرلەرى وسكەمەننىڭ 64 جاستاعى تۇرعىنىنان انىقتادى. ول باسقا مەملەكەتتىڭ ازاماتتىعىن العان، الايدا بۇل تۋرالى ۋاقىتىلى حابارلاماي، قازاقستاندىق قۇجاتتاردى پايدالانۋدى جالعاستىرعان. تەكسەرۋ بارىسىندا ايەلدىڭ قۇجاتتارى الىنىپ، ازاماتتىعىنان ايىرىلعانى تىركەلدى.