قوستانايدا دارىگەرلەر تەمىرجول ۆاگونىنىڭ توبەسىندە سۋرەتكە تۇسپەك بولعان 15 جاسار ءجاسوسپىرىمدى اۋىر ەلەكتر جاراقاتىنان امان الىپ قالدى. مەكتەپ وقۋشىسىنىڭ دەنەسىنەن 27 مىڭ ۆولتتان اساتىن توك وتكەن، دەپ حابارلايدى infohub.kz سايتى.
وقيعا 25 ماۋسىمدا بولعان. ءجاسوسپىرىم وبلىستىق بالالار اۋرۋحاناسىنىڭ تراۆمپۋنكتىنە دەنەسىنىڭ 60 پايىزىنان استامىن كۇيىك شالعان كۇيدە جەتكىزىلگەن.
تراۆماتولوگ-ورتوپەد ميراس ەلجاسوۆتىڭ ايتۋىنشا، بالا دەرەۋ رەانيماسياعا جات قىزىلىپ، وندا شامامەن ءبىر جارىم اي جاتقان.
«باقىتىمىزعا وراي، ونىڭ قول-اياعىن ساقتاپ قالۋعا مۇمكىندىك تۋدى»، — دەدى ەلجاسوۆ.
دارىگەردىڭ ايتۋىنشا، مۇنداي جاراقاتتاردا امان قالۋ مۇمكىندىگى وتە تومەن. الەمدىك جانە رەسپۋبليكالىق ستاتيستيكاعا سايكەس، مۇنداي زاقىم العان بالالاردىڭ شامامەن 90 پايىزى العاشقى اپتادا كوز جۇمادى.
ءقازىر ءجاسوسپىرىم رەانيماسيادان قاراپايىم پالاتاعا اۋىستىرىلعان. ونى ەمدەۋ تاعى ەكى-ۇش اپتاعا سوزىلۋى مۇمكىن، سوندىقتان اۋرۋحانادان شىعارۋ تۋرالى ءالى ەرتە.
ءجاسوسپىرىمنىڭ ايتۋىنشا، ول سول كۇنى دوستارىمەن سەرۋەندەپ جۇرگەن. ولار ۇيگە قىسقا جولمەن قايتۋدى ءجون كورىپ، تەمىرجولمەن ءجۇرىپتى. پويىزدى كورگەن سوڭ سۋرەتكە تۇسكىلەرى كەلگەن.
«مەن ۆاگوننىڭ توبەسىنە شىعىپ وتىردىم، دوسىم مەنى سۋرەتكە ءتۇسىردى. سوسىن ورنىمنان تۇرعاندا ەلەكتر دوعاسى سوقتى. سونىڭ سالدارىنان مەنى ەكى مەتردەي قاشىقتىققا لاقتىرىپ تاستادى»، — دەدى ءجاسوسپىرىم.
ول سۋرەتتى وقيعاعا دەيىن الەۋمەتتىك جەلىگە جاريالاپ ۇلگەرگەن.
توك سوققىسىنان كەيىن بالا ەسىن جوعالتقان. ەسىن جيعان سوڭ الدىمەن ۇيىنە ءوزى قايتپاق بولعان، الايدا كەلگەن دارىگەرلەر وعان العاشقى كومەك كورسەتىپ، اۋرۋحاناعا جەتكىزگەن.
«قابىلداۋ بولىمىندە ءبارى ماعان ۇلكەن كوزبەن قاراعانى ەسىمدە، سودان كەيىن ەس-تۇسسىز قالدىم»، — دەيدى وقۋشى.
ەمدەۋ شامامەن ءبىر جارىم ايعا سوزىلعان. ءجاسوسپىرىمدى قۇتقارۋعا دارىگەرلەر، سيرەك كەزدەسەتىن قىمبات دارى-دارمەكتەردى ساتىپ الۋعا كومەكتەسكەن دەمەۋشىلەر، سونداي-اق دونورلار قاتىسقان. بالاعا سيرەك كەزدەسەتىن قان توبى — ءتورتىنشى تەرىس قان قاجەت بولعان.
وقيعادان كەيىن ءجاسوسپىرىم بولاشاق ماماندىعى تۋرالى جوسپارىن وزگەرتۋگە شەشىم قابىلداعان. وقيعادان ەكى كۇن بۇرىن توعىزىنشى سىنىپ تۇلەگى ەلەكتريك ماماندىعىنا قۇجات تاپسىرعان ەدى. ەندى ول ءومىرىن مەديسينامەن بايلانىستىرۋدى كوزدەپ وتىر.
وقۋشى باسقا جاسوسپىرىمدەرگە دە ۇندەۋ تاستاپ، ولاردى ءوز قاتەلىگىن قايتالاماۋعا، سۋرەت ءۇشىن ءومىرىن قاتەرگە تىكپەۋگە شاقىردى.