الەۋمەتتىك جەلىلەردە قوستانايداعى وقۋ ورىندارىندا تەراكت جاسالادى دەگەن اقپارات تارادى. قۇقىق قورعاۋ ورگاندارى اتالعان نىسانداردى دەرەۋ تەكسەرىپ، جازبا اۆتورىن ىزدەۋگە كىرىستى، دەپ حابارلايدى infohub.kz سايتى.
«توبولينفو» باسىلىمىنىڭ مالىمەتىنشە، Telegram مەسسەندجەرىنىڭ ءبىر ارناسىندا قالاداعى ءبىرقاتار وقۋ ورنىنا قاتىستى ءقاۋىپ توندىرەتىن حابارلامالار پايدا بولعان. تىزىمدە قوستاناي وڭىرلىك ۋنيۆەرسيتەتى، پوليتەحنيكالىق جانە مەديسينالىق كوللەدجدەر، سونداي-اق №17 ورتا مەكتەبى اتالعان.
بەلگىسىز بىرەۋ عيماراتتارعا جارىلعىش قۇرىلعىلار قويىلعانىن جانە قۇقىققا قايشى ارەكەتتەرگە دايىندالىپ جاتقانىن مالىمدەگەن. ارەكەتتىڭ باستالۋ كۇنى رەتىندە 7 قازان كورسەتىلگەن.
قوستاناي وبلىسى پوليسيا دەپارتامەنتىنىڭ ءباسپاسوز قىزمەتى NUR.KZ تىلشىسىنە اقپارات تۇسكەن سوڭ شۇعىل تەكسەرۋ جۇرگىزىلگەنىن حابارلادى. «حاتتا كورسەتىلگەن بارلىق عيمارات تەكسەرىلدى. جارىلعىش زاتتار، جارىلعىش قۇرىلعىلار جانە وزگە دە كۇدىكتى زاتتار تابىلعان جوق. قوستاناي وقۋ ورىندارىندا جاسالادى دەپ جوسپارلانعان تەراكت تۋرالى اقپاراتتى الەۋمەتتىك جەلىلەردە تاراتۋ فاكتىسى بويىنشا پوليسيا سوتقا دەيىنگى تەرگەپ-تەكسەرۋ باستادى»، — دەپ سەندىردى پوليسيادا.
وبلىستىق پوليسيا دەپارتامەنتى ءقازىر جازبا اۆتورى مەن بولعان وقيعانىڭ بارلىق ءمان-جايى انىقتالىپ جاتقانىن قوستى.
سونىمەن قاتار ازاماتتاردى سابىر ساقتاۋعا، ۇرەيگە بوي الماۋعا جانە تەكسەرىلمەگەن اقپاراتتى تاراتپاۋعا شاقىردى. پوليسيا كورىنەۋ جالعان حابارلاما تاراتقانى ءۇشىن قىلمىستىق جاۋاپكەرشىلىك قاراستىرىلعانىن ەسكە سالدى.