جاپونيادا ءوتىپ جاتقان ازيا ويىندارىندا قازاقستاندىق جەڭىل اتلەت كريستينا موروزوۆا سپورتتىق جۇرىستەن جارتى مارافون قاشىقتىعىندا ەكىنشى بولىپ مارەگە جەتتى، دەپ حابارلايدى infohub.kz سايتى.
25 جاستاعى سپورتشى قاشىقتىقتى 1:35.25 ۋاقىتتا ەڭسەرىپ، كۇمىس ءۇشىن تارتىستا جۇڭگو وكىلى سزيان يۋنياننان نەبارى ءبىر سەكۋند وزىپ كەتتى. تاعى ءبىر قازاقستاندىق ەلميرا كاليمۋللينا 1:43.21 ناتيجەمەن التىنشى ورىنعا تۇراقتادى.
ازيا ويىندارى-2026
23 قىركۇيەك. جەڭىل اتلەتيكا. ءجۇرىس. جارتى مارافون. ايەلدەر
🥇 1. يان ليۋسزين (جۇڭگو) – 1:33.40
🥈 2. كريستينا موروزوۆا (قازاقستان) – 1:35.25
🥉 3. سزيان يۋنيان (جۇڭگو) – 1:35.26
…6. ەلميرا كاليمۋللينا (قازاقستان) – 1:43.21
ازيادانىڭ ءتورتىنشى كۇنىنىڭ باعدارلاماسىن اشقان جارىسقا سپورتتىق جۇرىستەن سەگىز سپورتشى قاتىستى.
موروزوۆانىڭ جۇلدەسى — قازاقستاندىق ايەلدەردىڭ وسى ديسيپلينادا ازيادالاردا جەڭىپ العان العاشقى كۇمىس مەدالى. سۆەتلانا تولستايا 1998 جىلى بانگكوكتە وتكەن ويىنداردا 10 كم قاشىقتىقتا ءۇشىنشى بولعان ەدى. ءتورت جىلدان كەيىن ول 20 كم جۇرىستەن قولا جۇلدەگە قول جەتكىزدى.
ەرلەر اراسىندا 50 كم جۇرىستەن 1994 جىلعى ازيا ويىندارىندا سەرگەي كورەپانوۆ التىن العان. ۆالەري بوريسوۆ 2002 جىلعى ويىنداردا جيىرما شاقىرىمدا چەمپيون اتاندى. بارلىق ازيادالاردىڭ مەدال ەسەبىندە قازاقستاندىق جەڭىل اتلەتتەر جەتىنشى ورىندا تۇر.
XX جازعى ازيا ويىندارىنىڭ سالتاناتتى اشىلۋى 19 قىركۇيەكتە ءوتتى. 45 ەلدىڭ سپورتشىلارى قاتىساتىن كەشەندى جارىستا 460 مەدال جيىنتىعى ساراپقا سالىنادى: 217ء-سى — ەرلەر، 204ء-ى — ايەلدەر، 39-ى — ارالاس رازريادتار اراسىندا. ازيادا-2026-دا قازاقستان قۇراماسىنىڭ ساپىندا 35 سپورت تۇرىنەن 558 سپورتشى سىنعا تۇسەدى.
ويىنداردىڭ ءبىرىنشى كۇنى قازاقستاندىقتار ءتورت التىن مەدال جەڭىپ الدى. ويىندار چەمپيوندارى اتانعاندار: ۆەلوشاباندوزدار ريناتا سۋلتانوۆا مەن الەكسەي لۋسەنكو، سونداي-اق كاراتەشىلەر جولامان بيگابىل مەن سوفيا بەرۋلسەۆا. قۇراما قورجىنىنا بەسىنشى التىندى قارساڭىندا مما سايىسكەرى ەركىنعالي بۇركىتالين قوستى. التىنشىسىن — ونىڭ ارالاس جەكپە-جەكتەن قۇرامالاس جولداسى قادىربەك شىنبايەۆ يەلەندى.
ويىنداردىڭ ءۇشىنشى كۇنىنەن كەيىن قازاقستان بەيرەسمي مەدال ەسەبىندە ءتورتىنشى ورىندا كەلەدى.