لاگەردەن قايتقاندا
بۇيرا تولقىنى كوبىكتەنىپ اسپانعا اتىلىپ جاتقان ەرتىستىڭ جيەگىندە سۋعا ءتونىپ كۇلىمدەپ تۇرعان نۇرا مەن تولەگەن گۇر ەتە قالعان سۋدىڭ قاتتى داۋسىنان ەلەڭ ەتە ءتۇستى.
اساۋ، اردا ەرتىستىڭ تولقىنى ارىستاننىڭ جالىنداي بولىپ بۋىرقانىپ جاتىر.
تولقىن كەيدە بۇرق-بۇرق ەتىپ شيىرشىق اتادى، كەيدە تۇبىنەن سىنىپ سىلق ەتىپ قۇلاعان بايتەرەكشە لىقسىپ ءبىرىنىڭ ۇستىنە ءبىرى قۇلاپ، ەكىنشىسى كوتەرىپ، ىققا قاراي ءجون سىلتەگەن سياقتى.
- مىنە، — دەدى تولەگەن تولقىنعا قۇمارتا قاراپ، — اساۋدىڭ اساۋى تولقىنداي-اق بولار. ەگەر، مۇنىڭ الدىنان ارپالىسقان ءبىر كۇش بوگەت بولسا، اناۋ ۇيدەي - ۇيدەي بولىپ دوڭبەكشىپ جاتقان تولقىنمەن توبەلەسپەگەندە نەسى قالدى؟
- يا،— دەدى نۇرا دا فيزيكاداعى ءبىر زاڭدى ەسىنە ءتۇسىرىپ. — ول قارسى سوققان كۇشكە بايلانىستى عوي.
- سەن ەتكەن جىلى جازعى تەكسەرۋ سىنىندا فيزيكادان ناشار باعامەن ءوتتىم، كۇز قايتا وتكىزەمىن دەگەنىڭ قايدا، بۇل زاڭدى قايدان بىلەسىڭ؟
- ءتىپتى فيزيكادان ەسىمدە ەش نارسە قالماسىن دەيسىڭ بە؟
- جوق، جوق، — دەدى تولەگەن ساسقالاقتاپ، — جاز دايىندالعان شىعارسىڭ؟
- الداعانىم عوي، مەن فيزيكادان ناشار وقىدىم دەگەنگە نانىپ قالعانىڭ با؟
ول سويدەدى دە، كەنەت لاگەردەگى ءوزىنىڭ پالاتاسىنا جۇگىرىپ كەتتى. تولەگەن نۇرانىڭ نەگە جۇگىرىپ كەتكەنىن بىلە الماي، ونىڭ سوڭىنان قۋا جونەلگىسى كەلدى دە ءوزىن-وزى توقتاتتى.
ەرتىستىڭ بويىنداعى تاماشا كورىنىسكە تەسىلە قاراپ تۇرعان تولەگەن جانىنا ەنتىگىپ جۇگىرىپ كەلگەن نۇرانى بايقاماي دا قالدى.
- مىنە، مەنىڭ باعالارىم، — دەپ نۇرا ءوزىنىڭ جىل اياعىندا مەكتەپتەن العان كۋالىك قاعازىن ۇسىندى. قاعازعا قانشا قاراسا دا تولەگەن «وتليچنو» دەگەن سوزدەن بوتەن باعا تابا المادى. ول فيزيكا دەگەن جەرگە ەرەكشە ۇڭىلە قارادى دا:
- مولودەس، نۇرا، مەن تۇنەۋگى ءوزىڭ فيزيكادان وتكىزە المادىم دەگەننەن بەرى ساعان قالاي جاردەم بەرسەم دەپ ويلايتىن ەدىم، — دەدى.
لاگەر كۇنى اياقتالۋعا جاقىندادى...
تولەگەندەر دەم الىپ جاتقان لاگەر ەرتىستىڭ جاعاسىندا.
جاعالاي قالىڭ ورمان، قىزىل گۇل، ولاردىڭ ءبارى دە بۇگىن بالالارعا: «قوش»، — دەپ قولىن بۇلعاعانداي كورىنەدى.
سولتۇستىكتەن ەبىپ وسكەن جىبەك جەل تولەگەننىڭ موينىنداعى قىزىل گالستۋگىن جەلبىرەتىپ تۇر.
بالالار ەرتىستىڭ جاعاسىنداعى كوك جىبەكتەي اياققا ورالعان شالعىن اراسىنان گۇل تەرۋگە كىرىسكەندە، تولەگەن اۋزىن اشىپ وكپەك جەلدىڭ سوققان لەبىمەن تەڭسەلىپ تۇرعان ءبىر قىزىل گۇلگە قاراپ ويعا باتتى.
- ءبىزدىڭ ءومىرىمىز دە وسى قىزىل گۇلدەي عوي، — دەدى ول گۇلگە ءبىر، كۇنگە ءبىر قاراپ.
ونىڭ ەسىنە بيىل الماتىعا بارىپ وقيتىنى ءتۇستى.
مىنە، بۇگىن لاگەر جابىلادى، بالالار اۋلىنا قايتادى.
تولەگەننىڭ قيمايتىنى جاز بويى بىرگە بولعان جولداستارى.
لاگەر پالاتالارى جاعىنان ماشينانىڭ گۇرىلدەگەن داۋسى شىقتى.
تولەگەن سول جاققا قاراي بەتتەدى.
اۋداننان كەلگەن بالالار ءوز اۋداندارىنا قايتۋ كەرەك. بالالار ءبىر-بىرىن قيماي قۇشاقتاسىپ، قول الىسىپ قوشتاسىپ جاتتى.
ءبىرىن-بىرى قيماعان كىشكەنتاي ازاماتتار، بىرىنە-بىرى ادرەسىن بەرىپ جاتتى. تولەگەندى نۇرا، تۇرىسبەك، اسەن ۇشەۋى اينالا قورشاپ تۇر.
ءقازىر تولەگەن جۇرەدى، بۇلار ەڭ اۋەلى تولەگەنمەن قوشتاسپاق. ءبارى دە ونىڭ قولىن قىسىپ، قۇشاقتاسىپ جاتىر.
- حات جازارسىڭ، تولەگەن!
- ارينە، — دەيدى ول.
ماشينا جولعا شىققاندا باسىن يزەپ قوش - قوشتاعان بالالاردىڭ داۋسى ماشينانىڭ گۇرىلىمەن ۇلاستى.
زىمىراپ كەلە جاتقان ماشينا ۇستىندە وتىرىپ پيونەرلەر قۋانىشتى ءان شىرقاۋمەن قارا جولدى قاق ايىرا بەلدەن اسىپ كەتتى...
You Might Also Like
-
قازاقشا ەت (بەسبارماق، بەشبارماق) اسقاندا ەڭ الدىمەن جىلىكتەپ بۇزىلعان ەتتى ادام سانىنا قاراي مولشەرلەيدى. تويعا نەمەسە قوناق اسىعا كوبىنەسە قوي سويىلادى. قوي ەتى جىلىكتەنگەندە 13...
-
ءشاريپا كوپكە شەيىن بالاسىز ءجۇردى. باستاپقى كەزدە بالاسىزدىقتى ەسكەرمەسە دە، 3-4 جىل ءومىر ءوتىپ، تۇراقتى قالىپقا تۇسكەن سوڭ، بالا كەرەكسىندى. وزىندەي جاس ايەلدەردىڭ ءبارى دە بالا ءسۇيىپ وتىر، باۋىرىندا...
